Angionevrologiya: insultni davolashda noyob jarrohlik usullari qo'llanilmoqda
2024-10-31 10:10:00 / Yangiliklar
Oddiy qilib aytganda, angionevrologiya — bu turli mutaxassisliklar, birinchi navbatda, kardiologiya va nevrologiya birgalikda ishlaydigan soha hisoblanib, asosiy vazifa — miya-qon tomir kasalliklarining oldini olish va davolashdir.
Demak, markaz asosan surunkali bosh miya qon aylanishi etishmovchiligi va multifokal ateroskleroz muammosi bilan shug'ullanganligi sababli bu erda qon tomir jarrohlari, jarrohlar, nevrolog hamda kardiologlar, anesteziolog-reanimatolog, endokrinolog, oftalmolog va boshqa shifokorlar bemorlar dardiga shifo topishadi.
Muassasada bemorlardagi patologik holatlarni tashxislash va davolashda qon tomir tizimini tekshiruvchi usullarning barchasi, ya'ni:
qon tomirlarni dupleks skanerlash,
transkranial dupleks skanerlash,
elektrokardiografiya,
exokardiografiya,
elektroentsefalografiya,
transkranial tserebral oksimetriya,
ultratovush diagnostika,
Xolter-monitoring,
tredmil-test,
multispiral kompyuter-tomografik angiografiya,
rentgenokontrast angiografiya,
fizioterapiya va funktsional reabilitasiya kabi zamonaviy usullardan foydalaniladi.
Vertebrobazilyar etishmovchilik mavjud bo'lgan bemorlarda umurtqa arteriyalariga maxsus tsilindrik stentlarni o'rnatish,
ichki uyqu arteriyasining ekstrakranial va intrakranial qismlarining aterosklerotik zararlanishida bir bosqichda yoki bosqichma-bosqich stentlash amaliyotlari,
uyqu arteriyalarining ko'plab aterosklerotik zararlanishlarida gibrid amaliyotlarini bajarish kabi noyob jarrohlik amaliyotlari yo'lga qo'yilgani sababli bemorlar darddan halos bo'lmoqda.
Bajarilayotgan jarrohlik amaliyotlari soni yildan yilga oshib bormoqda, xususan, 2022 yilda ularning soni 425 tani tashkil etgan bo'lsa, 2023 yilda bu ko'rsatkich 517 taga etib, ularning 192 tasi endovaskulyar usulda amalga oshirilgan. Aytish joizki, ekstrakranial arteriyalarda bajariluvchi barcha operasiyalar yuqori texnologik amaliyotlar qatoriga kiradi.
Markaz xodimlari kelgusida surunkali bosh miya qon aylanishini erta tashxislash ishlarini kuchaytirish, bunda targ'ibotni jonlantirish, telemedisina yo'nalishini takomillashtirish, hududiy filiallar faoliyatini rivojlantirish, bajarilayotgan yuqori texnologik amaliyotlar turini ko'paytirish kabi rejalarni o'z oldiga qo'yishgan.
Sog'liqni saqlash vazirligi
Matbuot xizmati