SSV: urologiya markazida buyrak tosh kasalligi 97 foiz holatda kam invaziv usulda davolanmoqda
2024-09-24 14:50:00 / Yangiliklar
Respublika ixtisoslashtirilgan urologiya ilmiy-amaliy tibbiyot markazi yurtimizda ushbu sohada bosh ilmiy-tekshiruv va davolash muassasasi hisoblanadi.
Bu erda eng ilg'or texnologiyalar asosida deyarli barcha turdagi urologik tibbiy xizmatlar ko'rsatiladi.
Xususan, markaz poliklinikasida bemorlar urolog, androlog, nefrolog, kardioterapevt, UTT shifokori, rentgenolog kabi tor soha mutaxassislari ko'rigidan o'tishi, shuningdek patogistolog va shifokor-tsitologdan zarur maslahatlar olishi mumkin.
Kasalliklarga tez va aniq tashxis qo'yishda MSKT, kompleks urodinamik tekshiruvlar, ultratovushli dopplerografiya, raqamli rentgen kabi eng zamonaviy tibbiy-asbob uskunalardan foydalaniladi.
— O'tgan yili markazda 30,5 ming nafardan ziyod bemor davolanib, ularning 9 mingga yaqinida jarrohlik amaliyotlari o'tkazildi. E'tiborlisi, ushbu operasiyalarning 75 foizdan ortig'i yuqori texnologik usulda bajarilgan, — deydi markaz direktori o'rinbosari Nodir Rahimov.
Markazda uzoq va yaqin xorij davlatlaridan kelgan fuqarolarga ham yuqori malakali tibbiy xizmat ko'rsatib kelinyapti.
Muassasada barcha turdagi endourologik, retroperitoneoskopik va Laparoskopik xamda peshob yo'li toshlarini masofadan turib maydalash kabi yuqori texnologik va kam invaziv operasiyalar yo'lga qo'yilgan.
Buning natijasida ochiq turdagi jarrohlik amaliyotlari hajmi 2,5 foizgacha qisqartirildi. Bu — dunyoning etakchi klinikalari darajasidagi ko'rsatkichdir.
Yurtimizda urologiya sohasiga robot jarrohligining kirib kelgani eng katta yangiliklardan biri bo'ldi. Ushbu texnologiya yordamida xirurgik amaliyotlarni bajarishni o'rganish maqsadida markaz mutaxassislari AQSh, Janubiy Koreya va boshqa qator xorijiy mamlakatlarning etakchi klinikalarida malaka oshirib qaytdi.
Ta'kidlash joiz, bugun yuqori texnologik urologik operasiyalar nafaqat markaz, balki respublikamizning boshqa xududlarida ham muvaffaqiyatli bajarib kelinmoqda.
Buning uchun muassasaning etakchi mutaxassislari viloyat, shahar va tumanlardagi shifoxonalar Urologlariga tegishli amaliy-uslubiy yordam ko'rsatib kelyapti.
Markazda mahalliy va xorijiy urologlarning malakasini oshirish maqsadida endourologiya, laparoskopiya, transuretral, masofadan turib toshni maydalash kabi yo'nalishlar bo'yicha ixtisoslik olish uchun 1-5 oylik maxsus dasturlar yo'lga qo'yilgan bo'lib, ular asosida bugungi kunga qadar 180 nafardan ziyod mutaxassis tayyorlandi.
Sog'liqni saqlash vazirligi
Matbuot xizmati.