O‘zbеkistоn Rеspublikаsi Sоg‘liqni saqlash vаzirligi

Sog'liqni saqlash vazirligining tegishli buyrug'i bilan tasdiqlangan tibbiyot oliy ta'lim muassasalarining bitiruvchilarini magistratura va klinik ordinatura dasturlari asosida yetakchi xorijiy oliy ta'lim muassasalari va markazlarida o'qitish tartibiga asosan: 

Tanlov haqida Sog'liqni saqlash vazirligi matbuot xizmati, Qoraqalpog'iston Respublikasi sog'liqni saqlash vazirligi, Toshkent shahar va viloyatlar sog'liqni saqlash boshqarmalari, tibbiyot oliy ta'lim muassasalari va ularning filiallari tomonidan ijtimoiy tarmoqdagi sahifalari, rasmiy veb-saytlari, ommaviy axborot vositalarida e'lon qilinadi.

Tanlovda tibbiyot oliy ta'lim muassasasining, shu jumladan, qo'shma ta'lim dasturlarining jahondagi top – 300 (yoki sohasi bo'yicha top – 100) reytingiga kirgan xorijiy oliy ta'lim muassasalariga magistraturaga yoki vazirlik tomonidan ishlab chiqilgan yetakchi xorijiy oliy ta'lim muassasalari hamda markazlarining ro'yxati asosida klinik ordinaturaga o'qishga qabul qilinganligi haqida hujjatga ega bitiruvchilar ishtirok etishlari mumkin.

Klinik ordinatura o'quv dasturlari bo'yicha yetakchi xorijiy oliy ta'lim muassasalari va markazlarining ro'yxati hududlarda tor sohadagi mutaxassislarga bo'lgan ehtiyojdan, shuningdek, oliy ta'lim yo'nalishlari va mutaxassisliklari klassifikatoriga muvofiq har yili tasdiqlanadigan tanlov yo'nalishlaridan kelib chiqib aniqlanadi.

Nomzodlar zarur hujjatlarni tanlov e'lon qilinganidan so'ng bir oy muddat ichida elektron shaklda onlayn platforma orqali taqdim etadilar.

Nomzodlar tanlov o'tkaziladigan muddat haqida uch ish kuni oldin ogohlantiriladi.

Tibbiyot va farmasevtika xodimlarining malakasini baholash markazi huzurida tashkil etiladigan ixtisoslashtirilgan attestasiya komissiyalari tomonidan nomzodlarning ro'yxati onlayn taqdim etilgan arizalar asosida shakllantirilib, suhbat rejalashtiriladi.

 Tanlov nomzodlar bilan ular yozgan insho (esse) asosida belgilangan mezonlar asosida baholanadigan hamda yozib olinadigan onlayn video-suhbat ko'rinishida o'tkaziladi.

Tanlov yakuni bo'yicha bayonnoma rasmiylashtiriladi hamda g'olib deb topilgan nomzodlar ro'yxati tibbiyotni rivojlantirish davlat maqsadli jamg'armasi Kuzatuv Kengashiga taqdim etiladi.

G'oliblar bilan vazirlik tomonidan shartnoma tuzilib, ular o'qib kelgandan so'ng 5 yil muddat mobaynida davlat tibbiyot muassasalarida uzluksiz ishlab berish majburiyatini oladilar.

Sog'liqni saqlash vazirligi 
Matbuot xizmati.