O‘zbеkistоn Rеspublikаsi Sоg‘liqni saqlash vаzirligi

Bunda davlat organlari va tashkilotlari hamda ustav fondida davlat ulushi 50 foiz va undan ortiq bo'lgan xo'jalik jamiyatlari maqsadli qabul buyurtmachilari hisoblanadi hamda kadrlarga bo'lgan o'z ehtiyojlarini Davlat komissiyasiga taqdim etadi.

Hududlar kesimida maqsadli qabul tegishli hududda doimiy yashaydigan hamda umumiy o'rta, o'rta maxsus va professional ta'lim tashkilotlarini tamomlagan abiturientlar orasida tanlov asosida amalga oshiriladi.

Maqsadli qabul kvotasi doirasida talabalikka tavsiya etilgan fuqaro bilan manfaatdor tuman yoki shahar hokimiyati, sohaviy davlat organi va oliy ta'lim tashkiloti o'rtasida to'rt tomonlama shartnoma tuziladi. 

Bunda talabani ish bilan ta'minlash va uning o'qishni yakunlagandan so'ng muayyan hududda yoki tashkilotda ishlab berishini monitoring qilish kadr buyurtmachisi zimmasiga yuklanadi.

2024/2025 o'quv yili qabulidan boshlab oliy ta'lim tashkilotlarining boshqa ta'lim shakllariga umumiy qabul parametri kunduzgi ta'lim shakli uchun belgilangan qabul kvotasidan ko'p bo'lmagan miqdorda belgilanadi. 

Davlat buyurtmasi bo'yicha kvotalar taqsimotida muhandislik, tibbiyot, aniq va tabiiy fanlar bilim sohalariga ustuvorlik beriladi.

Ya'ni, endi davlat grantlari falon universitet uchun berilmaydi, balki yo'nalish uchun ajratiladi. Biror oliy tibbiy ta'lim muassasasi uchun emas, tibbiyot yo'nalishi uchun grant berilib, ushbu yo'nalishga hujjat topshirgan abiturientlar orasida kvota doirasida eng yuqori ball to'plaganlari qabul qilinadi. 

Demak, biror tibbiyot ta'lim muassasasida boshqa muassasadan ko'ra past ball to'plagan talaba grantga o'qishi holatlari endi bo'lmaydi.

Rejaga ko'ra, davlat grantining barcha kvotasini bitta OTM olib qo'yishining oldini olish maqsadida ularga 50 foizlik cheklov qo'yiladi.

Sog'liqni saqlash vazirligi
Matbuot xizmati.