Bolalar milliy tibbiyot markazida xalqaro davolash protokollari to'liq joriy etiladi
2025-12-27 09:30:00 / Yangiliklar
Maqsad — ushbu markaz amaliyotiga xalqaro davolash protokollarini tatbiq etish masalasini muhokama qilishdan iborat.
Muloqot davomida bolalar milliy tibbiyot markazi va Yangsan klinikasi o'rtasida memorandum imzolandi.
Unga ko'ra, 2026 yilning fevralida jarayonning birinchi bosqichi boshlanib, koreyalik mutaxassislar yurtimizga tashrif buyuradi va markazda foydalanilayotgan davolash protokollarini o'rganib, o'z takliflarini beradi.
Ikkinchi bosqich esa 2026 yilning may oyida boshlanadi. Bunda Koreya xalqaro hamkorlik agentligi (KOICA)ning qariyb 200 ming AQSh dollari miqdoridagi grant mablag'i evaziga markazning 15 nafar bo'lim mudirlari, bosh mutaxassislaridan iborat ishchi guruh Yangsan klinikasiga yuboriladi. Safar davomida ular koreyalik hamkasblari faoliyatini o'rganib, malaka oshiradi.
Rejaga ko'ra, 2026 yil yakuniga qadar bolalar milliy tibbiyot markazida xalqaro davolash protokollari bosqichma-bosqich joriy etilib, to'liq amaliyotga tatbiq etilishi ko'zda tutilgan.
Ma'lumot uchun: Pusan milliy universiteti Yangsan klinikasi nafaqat Janubiy Koreya, balki dunyoning eng yirik va ilg'or ko'p tarmoqli shifoxonalaridan biri hisoblanadi. Mazkur nufuzli muassasa JCI akkreditasiyasiga ega va dunyoda yuqori darajadagi tibbiy xizmatlar ko'rsatish bilan tanilgan.
Eslatib o'tamiz: Prezidentimiz tashabbusi bilan barpo etilgan to'rtinchi darajali bolalar milliy tibbiyot markazi xalqaro darajadagi JCI sertifikatini olgan yurtimizdagi birinchi davlat tibbiyot muassasasiga aylangan. Poyoniga etayotgan yilda esa muassasa laboratoriyasi Britaniya xalqaro RIQAS (Randox International Quality Assessment Scheme) dasturi doirasida 4 yo'nalish bo'yicha "Certificate of Participation" sertifikatini qo'lga kiritdi. 2025 yilda markazning 10 nafardan ortiq xodimlari ilmiy darajalarni olishga muvaffaq bo'ldi.
Shuningdek, markazda 2025 yil davomida jami 94 ming nafardan ziyod bemorga sifatli tibbiy xizmat ko'rsatilgan, 6350 ta jarrohlik amaliyoti o'tkazilgan. Shundan 5000 dan ziyodi yuqori texnologik operasiyalar ekani, ayniqsa, diqqatga sazovor.
Sog'liqni saqlash vazirligi
Matbuot xizmati.