Navoiyda yo‘l harakati xavfsizligi va qulayligi yangi bosqichga olib chiqiladi
2026-06-11 13:15:00 / Yo'l harakati xavfsizligi
Viloyat hokimi Normat Tursunov shahar markazidagi transport qatnovi eng gavjum nuqtalardan biri — Navoiy va Amir Temur ko‘chalari kesishmasida harakatni qulaylashtirish bo‘yicha ishlab chiqilgan taklif loyihasi bilan joyida tanishdi.
Taqdimot davomida ushbu chorrahani tubdan modernizatsiya qilishga oid bir qator muhim yechimlar muhokama qilindi.
Chorrahadagi tirbandliklarning oldini olish, avtotransport vositalarining to‘xtab qolmay, erkin va xavfsiz harakatlanishini ta’minlash maqsadida zamonaviy geometrik yechimlar (yo‘naltiruvchi orolchalar) va harakatni tashkil etishning yangicha tizimi joriy etiladi.
Loyiha doirasida chorraha atrofi obodonlashtirilib, hududga Navoiy shahrining ko‘rkiga ko‘rk qo‘shuvchi "NAVOIY SHAHRIM" yozuvli zamonaviy stella va dekorativ arxitektura elementlari o‘rnatilishi rejalashtirilgan.
Ko‘chalar kesishmasida nafaqat haydovchilar, balki piyodalarning ham xavfsiz va qulay harakatlanishi, tungi yoritish tizimlari hamda yo‘l belgilarining zamonaviy andozalarga mos bo‘lishiga alohida e’tibor qaratiladi.
Viloyat rahbari loyihani puxta sozlash, qurilish va yo‘l sozlash ishlarini aholiga ortiqcha noqulayliklar tug‘dirmagan holda, qisqa muddatlarda hamda yuqori sifat bilan amalga oshirish bo‘yicha soha mas’ullariga zarur topshiriqlarni berdi.