“Yangi Navoiy” shaharchasi direksiyasi tomonidan investitsion loyihalar taqdimoti o‘tkazildi
2026-06-05 15:30:00 / Aqlli shahar
Tadbirda Navoiy viloyati hokimi Normat Tursunov ishtirok etib, qatnashchilarni Navoiy shahrida amalga oshirilayotgan keng ko‘lamli qurilish-bunyodkorlik ishlari bilan tanishtirdi.
Taqdimot davomida viloyatning investitsiya salohiyati va istiqbolli loyihalari haqida batafsil ma’lumot berildi. Xususan, “Yangi Navoiy” shaharchasi, “Yangi O‘zbekiston” bog‘i, “Yoshlik” ko‘li atrofida barpo etilayotgan turistik majmua, “Gʻalaba bog‘i” hamda “Qadimiy Karmana” turistik markazi loyihalari taqdim etildi.
Uchrashuvda mazkur loyihalar tarkibida quriladigan savdo va xizmat ko‘rsatish obyektlari, umumiy ovqatlanish shoxobchalari hamda ko‘ngilochar maskanlarni tadbirkorlarga ijara asosida berish, ularni boshqaruv jarayonlariga jalb etish va xususiy investisiyalar hisobiga yangi biznes loyihalarini rivojlantirish masalalari muhokama qilindi.
Shuningdek, investorlar uchun yaratilgan qulay shart-sharoitlar, muhandislik-kommunikatsiya tarmoqlari bilan ta’minlash ishlari hamda loyihalarni amalga oshirishda davlat tomonidan ko‘rsatilayotgan qo‘llab-quvvatlash mexanizmlari yuzasidan fikr almashildi.
Tadbir yakunida viloyat hokimi Normat Tursunov tadbirkor va investorlarni Navoiyda amalga oshirilayotgan yirik loyihalarda faol ishtirok etishga chaqirib, har bir istiqbolli tashabbus davlat tomonidan har tomonlama qo‘llab-quvvatlanishini ta’kidladi.