O‘zbekistonlik yosh arxitektorlar Xitoyda dron texnologiyalari va shaharsozlik tajribasi bilan tanishdi
2026-11-05 16:00:00 / Vazirlik yangiliklar
Vazirlikning yosh arxitektorlardan iborat delegatsiyasi Xitoyning Deyang shahrida joylashgan “Deyang EDA Intelligent Aviation Co., Ltd” korxonasiga tashrif buyurdi.
Tashrif davomida delegatsiya a’zolariga korxonada ishlab chiqarilayotgan zamonaviy dronlar, ularning turlari, texnik imkoniyatlari hamda turli sohalarda qo‘llash yo‘nalishlari haqida batafsil ma’lumot berildi.
Ayniqsa, shaharsozlik sohasida dron texnologiyalaridan foydalanish bo‘yicha Xitoy tajribasi alohida e’tibor markazida bo‘ldi. Ta’kidlanganidek, hududlarni o‘rganish, qurilish va ta’mirlash ishlariga tayyorlash, shuningdek, qurilish jarayonlarini monitoring qilishda dronlar yordamida 3D formatdagi ma’lumotlarni real vaqt rejimida to‘plash imkoniyati keng qo‘llanilmoqda.
Bu esa shaharsozlik jarayonlarida vaqt va mehnat resurslarini tejash, inson omiliga bog‘liq ish hajmini kamaytirish hamda qurilish ishlarining sifatini nazorat qilish samaradorligini oshirishga xizmat qilmoqda.
Shundan so‘ng, delegatsiya Deyang shaharsozlik va hududiy rejalashtirish ko‘rgazma markazida bo‘ldi.
Markazda shahar bosh rejasining maketi namoyish etilib, Deyang shahrida 1984-yildan buyon amalga oshirilgan bunyodkorlik ishlari, hududning rivojlanish bosqichlari hamda istiqboldagi shaharsozlik rejalari haqida batafsil ma’lumot berildi.
O‘zbekistonlik yosh arxitektorlar shaharni rejalashtirish va rivojlantirishda ustuvor ahamiyat qaratilgan jihatlar, yagona arxitekturaviy qiyofani shakllantirish tamoyillari hamda uzoq muddatli bosh rejalarni ishlab chiqish tajribasi yuzasidan xitoylik mutaxassislarga o‘zlarini qiziqtirgan savollar bilan murojaat qildilar.