Toshkentda yashil qurilish va zamonaviy shaharsozlik masalalari muhokama qilinmoqda
2026-10-15 13:00:00 / Vazirlik yangiliklar
Bugun Toshkent arxitektura-qurilish universiteti tashkil etilganining 35 yilligi munosabati bilan poytaxtimizda “Global Forum 2026: Shaharsozlik, arxitektura, qurilish va muhandislik yashil iqtisodiyotga o‘tish yo‘lida” xalqaro forumi bo‘lib o‘tmoqda.
Forumning ochilish marosimida Qurilish va uy-joy kommunal xo‘jaligi vaziri Sherzod Hidoyatov ishtirok etib, qurilish va shaharsozlik sohasida yashil iqtisodiyot tamoyillarini joriy etish, xavfsiz va qulay yashash muhitini yaratish masalalariga to‘xtaldi.
Vazir universitetning mamlakatimiz uchun malakali arxitektor va muhandislar tayyorlashdagi o‘rnini ta’kidlab, har bir mutaxassisning mehnati kelajakdagi shaharlar qiyofasi va aholi turmush sifatida aks etishini qayd etdi.
“Sizlar tayyorlayotgan har bir malakali mutaxassis ortida kelajakda barpo etiladigan xavfsiz bino, obod mahalla va insonlar uchun qulay yashash muhiti turibdi”, — dedi vazir.
Shuningdek, yangi turar joy massivlarini barpo etishda uy-joylar bilan bir qatorda maktab, bog‘cha, tibbiyot muassasalari, jamoat transporti va yashil hududlarni ham kompleks rejalashtirish zarurligi ta’kidlandi.
Vazir yashil qurilishning asosiy natijasi insonlarning kundalik hayotida sezilishi kerakligini qayd etdi. Buning uchun energiya va suv tejamkorligi, binolarning sifatli qurilishi, seysmik xavfsizlik hamda zamonaviy texnologiyalardan samarali foydalanish muhim ahamiyatga ega.
“Yashil qurilishning samarasi ham odamlarning kundalik hayotida sezilishi kerak. Qishda xonadon issiq, yozda salqin bo‘lishi, energiya sarfi kamayishi, suv tejalishi, hovli va ko‘chalarda soya-salqin hamda toza havo ta’minlanishi lozim”, — dedi vazir.
Shuningdek, “Shaffof qurilish” tizimini takomillashtirish, loyihalashda axborot modellashtirish texnologiyalarini qo‘llash va ilmiy ishlanmalarni amaliyotga tatbiq etish zarurligi ta’kidlandi. Bu borada universitetlar, ilmiy muassasalar va qurilish tashkilotlari o‘rtasidagi hamkorlik muhim o‘rin tutadi.
“Ilm-fan yutuqlari qurilish maydonlarida o‘zining amaliy natijasini berishi, amaliyotdagi muammolar esa yangi ilmiy izlanishlarga asos bo‘lishi kerak”, — dedi Sherzod Hidoyatov.
Forum doirasida shaharsozlik, arxitektura, qurilish va muhandislik sohalarida xalqaro tajriba almashish, ilmiy izlanishlarni rivojlantirish hamda o‘zaro hamkorlikni mustahkamlash masalalari muhokama qilinmoqda.