“Energiya tariflari islohotlari va aholini ijtimoiy qo‘llab-quvvatlash” mavzusida matbuot anjumani
2026-10-14 16:30:00 / Vazirlik yangiliklar
Matbuot anjumanida vazir o‘rinbosari Ozoda Jo‘rayeva ko‘p kvartirali uylarning energiya samaradorligini oshirish, issiqlik yo‘qotishlarini kamaytirish va energiya resurslaridan oqilona foydalanish borasida amalga oshirilayotgan ishlar haqida ma’lumot berdi.
Ta’kidlanganidek, bir necha yil avval kuzatilgan anomal sovuq ko‘p kvartirali uylarda issiqlik yo‘qotishlarini kamaytirish va binolarning issiqlik izolyatsiyasini yaxshilash zarurligini yaqqol namoyon etdi.
Shu bois Toshkent shahrida tajriba tariqasida 1991-yilgacha qurilgan ayrim ko‘p kvartirali uylarda energiya samaradorligini oshirishga qaratilgan sanatsiya ishlari amalga oshirildi. Tashqi devorlarni bazalt materiallari bilan qoplash orqali energiya sarfini 30–40 foizgacha tejash imkoniyati mavjudligi qayd etildi.
2024–2026-yillarda mamlakatimizning yetti hududida 1 834 ta ko‘p kvartirali uyning 2 million 281 ming kvadrat metrdan ortiq maydonida issiqlik izolyatsiyasi ishlari bajarildi. Jumladan, Jizzax viloyatida 1 481 ta, Sirdaryo viloyatida 186 ta, Andijon viloyatida esa 103 ta ko‘p kvartirali uyda tegishli ishlar amalga oshirildi. Shuningdek, Toshkent shahri, Toshkent, Surxondaryo va Farg‘ona viloyatlarida ham ushbu yo‘nalishda ishlar olib borildi.
Binolarning umumiy foydalanish joylarida energiya tejamkorligi va xavfsizlikni ta’minlash maqsadida boshqaruv organlari tomonidan 29 mingdan ortiq elektr shiti ta’mirlandi, 1 500 dan ortiq kodli temir eshik hamda 20 mingdan ortiq avtomatik eshik yopuvchi moslamalar o‘rnatildi. Bundan tashqari, 6,5 ming kvadrat metrdan ortiq framuga romlari va 40 mingdan ortiq energiya tejamkor chiroqlar o‘rnatish ishlari bajarildi.
Ayni paytda issiqlik energiyasini hisobga olish tizimini takomillashtirish, jumladan, zamonaviy "aqlli" hisoblagichlarni joriy etish masalalari ustida ham ish olib borilmoqda. Bu issiqlik energiyasi sarfini aniq hisobga olish, ta’minot sifatini nazorat qilish va to‘lovlarni amaldagi iste’molga yanada yaqinlashtirishga xizmat qiladi.
Energiya samaradorligini oshirish bo‘yicha xalqaro hamkorlik doirasidagi loyihalar ham davom etmoqda. Xususan, Germaniyaning GIZ tashkiloti bilan hamkorlikda Nukus shahridagi 60 xonadonli ko‘p kvartirali uyning energiya samaradorligini oshirish bo‘yicha pilot loyiha amalga oshirilmoqda. Loyiha doirasida binoning 2 600 kvadrat metr fasad qismi va 1 112 kvadrat metr tomini bazalt materiallari bilan qoplash ko‘zda tutilgan. Ayni paytda qurilish-montaj ishlarining 60 foizdan ortig‘i bajarilgan.
Kelgusida bu ishlarni yanada kengaytirish rejalashtirilgan. 2027–2030-yillarda Andijon, Buxoro, Samarqand va Chirchiq shaharlarida 1 032 ta ko‘p kvartirali uyning 2 million 123 ming kvadrat metrdan ortiq tashqi fasad qismini issiqlik izolyatsiyasi bilan qoplash ko‘zda tutilgan. Mazkur dastur doirasida loyihaoldi hujjatlarini tayyorlash uchun Jahon banki tomonidan 2 million AQSh dollari miqdorida grant mablag‘lari ajratilgan.
Umuman, 2024–2030-yillarda 2 866 ta ko‘p kvartirali uyning 4,4 million kvadrat metrdan ortiq maydonida issiqlik izolyatsiyasi ishlarini amalga oshirish rejalashtirilgan.