“O‘zshaharsozlik LITI” DMda loyiha tashkilotlari vakillari ishtirokida seminar tashkil etildi
2026-10-12 16:00:00 / Vazirlik yangiliklar
Bugun “O‘zshaharsozlik LITI” DMda Qurilish va uy-joy kommunal xo‘jaligi vazirining birinchi o‘rinbosari J.Arashov rahbarligida bosh loyiha institutlari hamda xususiy loyiha tashkilotlari vakillari ishtirokida seminar tashkil etildi.
Unda “Shaffof qurilish” milliy axborot tizimida ishga tushirilgan loyiha-smeta hujjatlarini ishlab chiqish moduli, uning imkoniyatlari va amaliyotda foydalanish tartibi batafsil muhokama qilindi.
Seminar davomida mazkur modulning ishlash mexanizmlari, loyiha-smeta hujjatlarini ishlab chiqish jarayonida undan foydalanish bosqichlari hamda loyiha tashkilotlari faoliyatida raqamli vositalarni samarali qo‘llash masalalariga e’tibor qaratildi. Shuningdek, yangi moduldan foydalanishda tashkilotlar oldida turgan vazifalar va amaliy jihatlar yuzasidan tushuntirishlar berildi.
Muloqot jarayonida loyiha tashkilotlari vakillarining savol va takliflari tinglanib, ularning kundalik faoliyatida uchrayotgan muammoli masalalar muhokama qilindi. Bildirilgan murojaatlar yuzasidan tegishli tushuntirishlar berilib, mavjud masalalarni hal etish bo‘yicha takliflar yuzasidan fikr almashildi.
Bunday seminar va amaliy uchrashuvlar “Shaffof qurilish” platformasining yangi imkoniyatlarini soha vakillariga yetkazish, ularning tizimdan foydalanish bo‘yicha bilim va ko‘nikmalarini oshirish, shuningdek, loyiha tashkilotlari bilan o‘zaro hamkorlikni mustahkamlashga xizmat qiladi.