Arxitektura va qurilish sohasi faxriylari kengashining 9 oylik faoliyati sarhisob qilindi
2026-10-09 12:00:00 / Vazirlik yangiliklar
Oʻzbekiston Respublikasi arxitektura va qurilish sohasi faxriylari kengashining 2026-yil 9 oyi davomida amalga oshirgan ishlari yuzasidan tahliliy hisobot yigʻilishi boʻlib oʻtdi.
Yigʻilishda faxriylarni ijtimoiy qoʻllab-quvvatlash, soha rivojiga hissa qoʻshgan mutaxassislarni eʼtirof etish, yosh kadrlarga ustozlik qilish hamda arxitektura va shaharsozlik sohasini rivojlantirish boʻyicha amalga oshirilgan ishlar muhokama qilindi.
Hisobot davrida faxriylarni dam olish va sanatoriylarda davolanish uchun yuborish boʻyicha jami 1 034 ta murojaat yoʻllangan. Shuningdek, faxriylarning ijtimoiy himoyasini taʼminlash va ularni qoʻllab-quvvatlash maqsadida davra suhbatlari tashkil etildi.
"Shaffof qurilish" milliy axborot tizimi maʼlumotlari asosida sohada faoliyat yuritayotgan 2 421 dan ziyod tashkilot roʻyxati shakllantirildi. Kelib tushgan murojaatlar asosida 1 055 nafar nomzod Kengash faxriylari safiga qabul qilindi. Jumladan, 2026-yilning 9 oyida 238 nafar nomzod faxriylikka qabul qilindi.
Yosh mutaxassislarning bilim va tajribasini oshirish maqsadida 15 ta oliy taʼlim muassasasi bilan hamkorlikda "Ustoz-shogird" tadbirlarini oʻtkazish rejalashtirildi. III chorak yakuniga qadar 4 ming nafardan ziyod talaba ishtirokida 33 ta tadbir tashkil etildi.
Arxitektura va shaharsozlik sohasini rivojlantirish, qonunchilik hujjatlarini takomillashtirish boʻyicha ham taklif va tavsiyalar ishlab chiqildi. Kengash faoliyati davomida 4 ta qonun, 40 ta normativ-huquqiy hamda 22 ta idoraviy hujjat boʻyicha takliflar shakllantirildi. Shuningdek, soha rivojiga munosib hissa qoʻshgan 800 nafardan ziyod mutaxassisga Kengash faxriysi yorliqlari topshirildi. "Oʻzbekiston bunyodkori" gazetasida faxriylar haqida 30 dan ziyod maqola chop etildi.
Yigʻilish yakunida joriy yilning IV choragida amalga oshiriladigan vazifalar belgilab olindi. Xususan, faxriylarni qoʻllab-quvvatlash, yosh mutaxassislarga ustozlik qilish, qonunchilikni takomillashtirish hamda arxitektura va shaharsozlik sohasidagi dolzarb muammolar yechimi boʻyicha takliflar ishlab chiqish ishlari davom ettiriladi.