Mamlakatimizda issiqlik ta’minotini 2032-yilgacha barqaror rivojlantirish strategiyasi ishlab chiqilmoqda
2026-09-24 15:20:00 / Vazirlik yangiliklar
Bugun vazir o'rinbosari Ozoda Jo'rayeva boshchiligida “O‘zbekistonda issiqlik ta’minotini 2032-yilgacha barqaror rivojlantirish strategiyasi”ni ishlab chiqish bo‘yicha vazirlik va idoralar, ilmiy-tadqiqot institutlari hamda oliy ta’lim muassasalarining ekspertlari ishtirokida dastlabki muhokama uchrashuvi o‘tkazildi.
Unda issiqlik ta’minoti sohasining bugungi holati, mavjud infratuzilmaning texnik va texnologik muammolari, issiqlik energiyasini ishlab chiqarish va uzatishdagi yo‘qotishlar, energiya resurslaridan samarali foydalanish, shuningdek, sohani modernizatsiya qilish masalalari muhokama qilindi.
Qayd etilganidek, strategiyani ishlab chiqish jarayoniga xalqaro tajribani keng jalb etish maqsadida Jahon banki ekspertlari ham jalb qilinmoqda. Bu orqali sohani rivojlantirish bo‘yicha ilg‘or xalqaro yondashuvlar, zamonaviy texnologik yechimlar va energiya samaradorligiga oid tajribalarni O‘zbekiston sharoitiga moslashtirishga alohida e’tibor qaratiladi.
Shuningdek, markazlashgan issiqlik ta’minotini rivojlantirish, yoqilg‘i resurslari tarkibini diversifikatsiya qilish, muqobil va qayta tiklanuvchi energiya manbalaridan foydalanish, xususiy sektor va investitsiyalarni jalb qilish, raqamli texnologiyalarni joriy etish hamda binolarning energiya samaradorligini oshirish Strategiyaning ustuvor yo‘nalishlari sifatida belgilanmoqda.
Muhimi, ishlab chiqilayotgan Strategiya sohadagi mavjud muammolarni tizimli hal etish, aholini sifatli va ishonchli issiqlik energiyasi bilan ta’minlash, energiya resurslaridan samarali foydalanish hamda sohaning uzoq muddatli barqaror rivojlanishini ta’minlashga qaratilgan aniq chora-tadbirlarni qamrab oladi.
Dastlabki muhokama davomida bildirilgan ekspertlik taklif va tavsiyalari Strategiyaning maqsad hamda vazifalarini shakllantirishda inobatga olinishi alohida qayd etildi.