Qurilish va uy-joy kommunal xo‘jaligi vazirligi hamda Gonkong Maxsus ma’muriy hududi Taraqqiyot byurosi vakillari o‘rtasida videokonferensaloqa shaklida uchrashuv o‘tkazildi
2026-09-16 15:00:00 / Vazirlik yangiliklar
Qurilish va uy-joy kommunal xo‘jaligi vazirligi hamda Gonkong Maxsus ma’muriy hududi Taraqqiyot byurosi vakillari o‘rtasida videokonferensaloqa shaklida uchrashuv o‘tkazildi.
Unda qurilish va shaharsozlik sohalarida tajriba almashish hamda istiqbolli hamkorlik yo‘nalishlari muhokama qilindi.
Gonkong tomoni qurilish standartlarini ishlab chiqish va yangilash, xalqaro me’yorlarni mahalliy sharoitlarga moslashtirish, innovatsion qurilish materiallari hamda zamonaviy texnologiyalarni amaliyotga joriy etish bo‘yicha tajribasi bilan bo'lishdi.
Modulli-integratsiyalashgan qurilish, BIM texnologiyalari, qurilish robotlari va ultra yuqori samarali betondan foydalanish masalalariga alohida e’tibor qaratildi.
Shuningdek, hududlarni rivojlantirish, bosh rejalarni ishlab chiqish, yer uchastkalaridan foydalanishni tartibga solish hamda qurilish obyektlariga ruxsat berish tizimi muhokama qilindi. Gonkongda mazkur jarayonlar tegishli davlat organlarining xulosalari asosida markazlashtirilgan va elektron shaklda amalga oshirilishi qayd etildi.
Uchrashuvda davlat xaridlari sohasidagi elektron tender tizimlari bo‘yicha ham fikr almashildi. Tomonlar tender jarayonlarini raqamlashtirish, shaffoflikni ta’minlash, xorijiy kompaniyalarni tekshirish va takliflarni baholashda sun’iy intellekt imkoniyatlaridan foydalanish masalalarini ko‘rib chiqdilar.
O‘zbekiston tomoni mamlakatimizda faoliyat yuritayotgan avtomatlashtirilgan elektron xarid tizimi tajribasini taqdim etishga tayyorligini bildirdi. Muzokaralar yakunida qurilish standartlari, modulli qurilish, BIM texnologiyalari, shaharsozlik va elektron tenderlar bo‘yicha uslubiy hamda taqdimot materiallari bilan almashish, shuningdek, alohida yo‘nalishlar kesimida ekspertlar ishtirokida qo‘shimcha uchrashuvlar tashkil etishga kelishib olindi.