“Shaffof qurilish” tizimlari Koreyadagi xalqaro ko‘rgazmalarda namoyish etilmoqda
2026-09-09 12:30:00 / Vazirlik yangiliklar
Ayni kunlarda Koreya Respublikasining Pusan shahrida “World Smart City Expo-2026” hamda “K-ICT WEEK in BUSAN-2026” xalqaro ko‘rgazmalari bo‘lib o‘tmoqda.
Unda Qurilish va uy-joy kommunal xo‘jaligi vazirligi huzuridagi Axborot-kommunikatsiya texnologiyalarini rivojlantirish Respublika markazi o‘z stendi bilan ishtirok etmoqda.
Markaz stendida O‘zbekistonda qurilish va uy-joy kommunal xo‘jaligi sohasini raqamlashtirish bo‘yicha joriy etilgan axborot tizimlari va zamonaviy yechimlar namoyish etilyapti.
Xususan, stendda davlat xizmatlari, tender platformasi, qurilish va loyiha tashkilotlari reytingi, shaffof.ai, qurilish nazorati hamda monitoring tizimlari taqdim etilmoqda.
Shuningdek, “Mening uyim” va “Issiqlik ta’minoti” billing tizimlari, boshqaruv organlari reyestri, mutaxassislarni sertifikatlash, bino va inshootlar energiya auditi, “Xavfsiz lift” hamda “Ogoh fuqaro” platformalari ishtirokchilarga tanishtirilmoqda.