Vazir o‘rinbosari fuqarolarning murojaati asosida Yashnobod tumanida bo‘lib aholi bilan uchrashdi
2026-09-08 20:00:00 / Vazirlik yangiliklar
Ta’kidlaganimizdek, vazir o‘rinbosari Ozoda Jo‘rayeva fuqarolarning murojaati asosida Toshkent shahri Yashnobod tumani Aviasozlar 4-mavzesi 33-uyda bo‘lib, aholi bilan uchrashgan edi.
Uchrashuv davomida ko‘p kvartirali uyning umumiy holati, yerto‘la qismi, muhandislik-kommunikatsiya tarmoqlari yuzasidan aholining murojaat va e’tirozlari o‘rganilgan edi.
Jarayonda aholining fikr va takliflari inobatga olinib, aniqlangan muammolarni bartaraf etish, uyda sanitariya va texnik holatni yaxshilash hamda hududda tartibni ta’minlash bo‘yicha mas’ullarga ikki kun muddatda bajarilishi lozim bo‘lgan aniq topshiriqlar berildi.
Belgilangan muddatdan so‘ng mazkur manzildagi ishlarning bajarilishi vazir o'rinbosari tomonidan qayta o‘rganildi. Bugungi kunda uyning yerto‘la qismidagi muammolar bartaraf etilib, quvurlar almashtirildi, yerto‘la tozalanib, oqlandi va dezinfeksiya qilindi.
Shuningdek, ko‘p qavatli uy aholisi bilan o‘tkazilgan muloqot va ularning xohish-istaklari inobatga olinib, mazkur uy “Navro‘z BSK” boshqaruv organiga o‘tkaziladigan bo‘ldi.
O‘rganish davomida Ozoda Jo‘rayeva ko‘p kvartirali uylarni samarali boshqarish va saqlashda aholi hamda boshqaruv organining o‘zaro hamkorligi muhim ekanini ta’kidladi.
Boshqaruv organi o‘z zimmasidagi majburiyatlarni sifatli va o‘z vaqtida bajarishi, aholi esa o‘z navbatida umumiy mulkka ehtiyotkorlik bilan munosabatda bo‘lishi, muhandislik-kommunikatsiya tarmoqlaridan to‘g‘ri foydalanishi, oqova tizimlariga chiqindi tashlamasligi va aniqlangan muammolar haqida boshqaruv organini o‘z vaqtida xabardor qilishi lozimligi qayd etildi.
Ta'kidlanganidek, boshqaruv organi va aholi o‘rtasidagi hamkorlik qanchalik samarali bo‘lsa, ko‘p kvartirali uylarni saqlash va aholiga qulay yashash muhitini yaratish ham shunchalik yaxshi yo‘lga qo‘yiladi.
Shu orqali fuqarolar tomonidan bildirilgan murojaat amaliy natija bilan yakunlandi.