O‘zbekiston Respublikasi Qurilish va uy-joy kommunal xo‘jaligi vazirligi

  Tadbir davomida vazirlik markaziy apparati xodimlarining siyosiy bilim va ko‘nikmalarini yanada oshirish, ularning huquqiy va fuqarolik mas’uliyatini mustahkamlashga qaratilgan mavzular muhokama qilindi.

  Dastlab, Inson resurslarini rivojlantirish va boshqarish boshqarmasi mas’uli K.Xolmatov so‘zga chiqib, siyosiy-ma’rifat soatlarining xodimlar dunyoqarashini kengaytirish, mamlakatimizda amalga oshirilayotgan islohotlarning mazmun-mohiyatini chuqur anglashdagi ahamiyati haqida fikr bildirdi.

  Shuningdek, Korrupsiyaga qarshi kurashish agentligi mas’uli J.Fayziyev tomonidan xodimlarga korrupsiyaga nisbatan murosasiz munosabatni shakllantirish, xizmat vazifalarini bajarishda qonuniylik va halollik tamoyillariga qat’iy rioya qilish yuzasidan tushuntirishlar berildi. Xususan, mansab vakolatlarini suiiste’mol qilish, manfaatlar to‘qnashuviga yo‘l qo‘yish hamda korrupsiyaviy huquqbuzarliklarni sodir etishning salbiy oqibatlari haqida batafsil ma’lumotlar berilib, bunday holatlarning oldini olish bo‘yicha har bir xodim mas'ulligi ta'kidlandi.

  Aytish joizki, bunday siyosiy-ma’rifiy tadbirlar xodimlarning siyosiy va huquqiy savodxonligini oshirish, fuqarolik mas’uliyatini yuksaltirish hamda davlat xizmatida halollik va qonuniylik tamoyillarini mustahkamlashda muhim ahamiyat kasb etadi.