Korrupsiyaga qarshi kurash va shaharsozlik sohasidagi o‘rganish natijalari muhokama qilindi
2026-08-25 21:00:00 / Vazirlik yangiliklar
Bugun Qurilish va uy-joy kommunal xo‘jaligi vazirining birinchi o‘rinbosari J.Arashov raisligida korrupsiyaga qarshi kurashish hamda hududlarda shaharsozlik faoliyatiga oid yo‘nalishlarda o‘tkazilgan o‘rganishlar natijalariga bag‘ishlangan tanqidiy yig‘ilish bo‘lib o‘tdi.
Unda vazirlik mas’ullari, tizim tashkilotlari rahbarlari, hududiy va tuman boshqarmalari rahbarlari hamda komplayens nazorati bo‘yicha mas’ul xodimlar ishtirok etdi.
Yig‘ilishda Davlat arxitektura nazorati departamenti tomonidan hududlarda o‘tkazilgan o‘rganishlar natijalari muhokama qilindi. Hududlar kesimidagi tahlillarga ko‘ra, aniqlangan kamchiliklarning salmoqli qismi Jizzax, Andijon, Buxoro, Namangan, Sirdaryo va Farg‘ona viloyatlariga to‘g‘ri kelishi qayd etildi.
Yig‘ilishda faoliyatida kamchiliklarga yo‘l qo‘ygan mas’ullarga nisbatan belgilangan tartibda intizomiy choralar ko‘rish masalasi ko‘rib chiqildi.
Shuningdek, korrupsiyaviy xavflarning oldini olish, ochiqlik va shaffoflikni ta’minlash, xodimlar bilan profilaktik va individual ishlarni kuchaytirish zarurligi ta’kidlandi.
“Korrupsiyaviy holat yuz berishiga yo‘l qo‘ygan yoki bunday holatlarga bepisandlik bilan qaragan har qanday rahbarga nisbatan tegishli chora ko‘riladi. Bu borada ochiqlik va shaffoflikni ta’minlash, har bir xodim bilan individual ishlash muhim”, — dedi J.Arashov.
Yig‘ilish davomida Korrupsiyaga qarshi kurashish agentligi mas’ul xodimi J.Fayziyevning sohada amalga oshirilgan ishlar, mavjud kamchiliklar va erishilgan natijalar bo‘yicha axboroti ham eshitildi.
Muhokama yakunida mas’ullarga aniqlangan kamchiliklarni bartaraf etish, korrupsiyaviy xavflarni kamaytirish va shaharsozlik sohasida belgilangan talablarga rioya etilishini ta’minlash bo‘yicha tegishli vazifalar belgilab berildi.