Respublikada ko‘p kvartirali uylarni kuz-qish mavsumiga tayyorlash ishlari davom etmoqda
2026-08-21 19:30:00 / Vazirlik yangiliklar
Bugungi kunda respublikada 1,6 mln dan ortiq xonadonni qamrab olgan 46 mingdan ziyod ko‘p kvartirali uy mavjud. Ko‘p kvartirali uy-joy fondini kuz-qish mavsumiga tayyorlash, muhandislik-kommunikatsiya tarmoqlarining barqaror ishlashini ta’minlash hamda tutash hududlarni obodonlashtirish bo‘yicha joriy yilda keng ko‘lamli ishlar amalga oshirilmoqda.
Mazkur yo‘nalishda ko‘p kvartirali uylarni boshqarish tizimini takomillashtirish, uylarning umumiy mol-mulkini saqlash, texnik holatini yaxshilash va energiya samaradorligini oshirishga qaratilgan chora-tadbirlar amalga oshirilmoqda.
Jumladan, Davlatimiz rahbarining 48-son qarori bilan ko‘p kvartirali uylarni boshqarish tizimini takomillashtirish, umumiy mol-mulkni saqlash va energiya samaradorligini ta’minlash bo‘yicha vazifalar belgilangan.
Shuningdek, Hukumatning 2026-yil 25-iyundagi 117-son bayoni bilan respublika hududlaridagi 6 686 ta ko‘p kvartirali uyni, ya’ni qariyb 170 mingta xonadonni kuz-qish mavsumiga tayyorlash bo‘yicha reja ko‘rsatkichlari tasdiqlangan. Mazkur ishlar uchun boshqaruv tashkilotlarining 242 mlrd so‘m mablag‘i yo‘naltirilishi belgilangan.
Rejaga muvofiq 1 145 ta tom, 6 687 ta kirish yo'lagi, 850 ta yerto‘la, 437 ta ichki muhandislik quvurlari, 724 ta fasad, 28 mingdan ortiq elektr shitlari ta’mirlanishi, shuningdek, qariyb 1 500 ta temir eshik, 6,5 ming kvadrat metrdan ortiq framuga va romlar bo‘yicha ishlar amalga oshirilishi hamda 40 mingdan ortiq energiya tejamkor chiroqlar o‘rnatilishi rejalashtirilgan.
Hisobot davrida belgilangan ishlar doirasida 5 988 ta ko‘p kvartirali uyda, ya’ni rejalashtirilgan uylarning qariyb 90 foizida tegishli ta’mirlash ishlari amalga oshirildi. Shu bilan birga, kuz-qish mavsumini barqaror o‘tkazish maqsadida hududlarda zarur qurilish va ta’mirlash materiallarining zaxirasi shakllantirilmoqda. Xususan, 108 ming kvadrat metr shifer va folgaizol, 99,6 ming pogon metr turli xildagi quvurlar, 22 mingta zadvijka va ventil, 15,7 ming kvadrat metr oyna va romlar hamda 1 102 tonna qum-tuz aralashmasi zaxiraga jamlangan.
Dasturga qo‘shimcha ravishda, boshqaruv organlarining 124 mlrd so‘m mablag‘lari hisobidan hududlardagi 2 mingdan ortiq uylar mukammal va joriy ta’mirlandi. Yil yakuniga qadar yana 2 000 ga yaqin uylarni ta’mirlash rejalashtirilgan.
Joriy yilda qo'shimcha dasturlar doirasida 549 ta ko‘p kvartirali uyning 495 ming kvadrat metr fasad qismini bazalt bilan qoplash ishlari yakunlangan. Shuningdek, qariyb 30 ming xonadonni qamrab olgan 630 ta ko‘p kvartirali uyning ichki issiqlik tizimlarini tiklash ishlari amalga oshirilmoqda. Bugungi kunga qadar 546 ta uyda mazkur ishlar yakunlangan.
Ko‘p kvartirali uylarning tutash hududlarini obodonlashtirish va ko‘kalamzorlashtirish ishlari ham tizimli ravishda amalga oshirilmoqda. Xususan, “Mahallada obodlik va mehr-saxovat oyligi” doirasida:
- 12 mingdan ortiq ko‘cha;
- 10,2 ming gektardan ziyod tutash hudud;
- 7,2 ming kilometrdan ortiq ariq va lotoklar obodonlashtirildi.
Shuningdek, 11 ming tonnadan ortiq chiqindi olib chiqildi, 5 664 ta bolalar maydonchasi tartibga keltirildi. Hududlarni ko‘kalamzorlashtirish doirasida 104 mingdan ortiq gul va buta ko‘chatlari ekildi, 89 mingdan ortiq daraxtga shakl berildi hamda 130 ta “kichik yashil bog‘” tashkil etildi.
Umuman, ko‘p kvartirali uylarni kuz-qish mavsumiga tayyorlash bo‘yicha belgilangan chora-tadbirlarni o‘z vaqtida va sifatli amalga oshirish, muhandislik-kommunikatsiya tarmoqlarining barqaror ishlashini ta’minlash, ehtimoliy avariya holatlarining oldini olish hamda aholi uchun qulay sharoit yaratish bo‘yicha ishlar hududlarda davom ettirilmoqda.