Qurilish va uy-joy kommunal xo‘jaligi vazirligi (Rasmiy munosabat)
2026-08-21 13:30:00 / Rasmiy munosabat
Ko‘p kvartirali uylarni boshqarish organini elektron reyestrga kiritish tartibi bo‘yicha kelib tushayotgan murojaatlar yuzasidan quyidagilarni ma’lum qilamiz.
O‘zbekiston Respublikasi Vazirlar Mahkamasining 2024 yil 18 dekabrdagi 853-son qaroriga 1-ilova bilan tasdiqlangan “Ko‘p kvartirali uylarni boshqarish organlarining elektron reyestrini yuritish bo‘yicha ma’muriy reglament”ning 3-bobi 15-bandiga muvofiq, talabgorni ko‘p kvartirali uyni boshqarish organiga biriktirish uchun so‘rovnomaga quyidagi hujjatlar ilova qilinadi:
- ko‘p kvartirali uyni boshqarish vakolatini beruvchi hujjat nusxasi;
- topshirish-qabul qilish dalolatnomasi.
Mazkur hujjatlar ilova qilingan holda davlat xizmatidan foydalanish uchun Davlat xizmatlari markazlariga shaxsan murojaat qilish yoki O‘zbekiston Respublikasi Yagona interaktiv davlat xizmatlari portali orqali elektron shaklda ariza berish mumkin.
Shu bilan birga, ko‘p kvartirali uyni boshqarish organini elektron reyestrga kiritish jarayonida belgilangan talablarga rioya qilish va zarur hujjatlarni to‘liq taqdim etish muhim ahamiyatga ega ekanini ma’lum qilamiz.
Qurilish va uy-joy kommunal xo‘jaligi vazirligi fuqarolar va yuridik shaxslarga ko‘p kvartirali uylarni boshqarish sohasida davlat xizmatlaridan belgilangan tartibda foydalanishlarida zarur tushuntirish va amaliy ko‘mak ko‘rsatishga tayyorligini bildiradi.