Yaponiya kompaniyalari O‘zbekistonda ko‘p qavatli uylarni boshqarish sohasiga investitsiya kiritishga qiziqish bildirmoqda
2026-07-27 21:00:00 / Vazirlik yangiliklar
Vazir o‘rinbosari Ozoda Jo‘rayeva Yaponiyaning Agnostri, Hamaya, Aria Investment Trust, Serious Pro Support, Granasset hamda Global Silk Road kompaniyalari vakillari bilan uchrashuv o‘tkazdi.
Uchrashuv davomida ko‘p qavatli uylarni boshqarish sohasini rivojlantirish, xorijiy investitsiyalarni jalb etish, boshqaruv kompaniyalari faoliyatini takomillashtirish hamda zamonaviy servis xizmatlarini joriy etish masalalari muhokama qilindi.
Qayd etilganidek, yaponiyalik investorlar bugungi kunda aholi roziligi asosida Xorazm viloyatidagi 50 ga yaqin boshqaruvsiz ko‘p qavatli uylarga xizmat ko'rsatib,kompleks kapital ta’mirlash va zamonaviy servis xizmatlarini yo‘lga qo‘yish bo‘yicha amaliy ishlarni olib bormoqda.
Shuningdek, Yaponiya kompaniyalari vakillari Toshkent shahridagi boshqaruvsiz ko‘p qavatli uylarni boshqaruviga olish, uy-joy fondini boshqarishda Yaponiyaning ilg‘or tajribasi, zamonaviy boshqaruv texnologiyalari, texnik va moddiy imkoniyatlari hamda sifatli servis xizmatlarini joriy etish bo‘yicha o‘z takliflarini bildirdilar.
“Yaponiya kompaniyalarining O‘zbekiston bozoriga qiziqish bildirayotgani ko‘p qavatli uylarni boshqarish sohasida amalga oshirilayotgan islohotlar o‘z samarasini berayotganini ko‘rsatadi. Biz investitsiyalar, zamonaviy texnologiyalar va yuqori sifatli servis xizmatlarini jalb etish orqali sohaning raqobatbardoshligini yanada oshirishni maqsad qilganmiz,” — deya ta’kidladi vazir o‘rinbosari Ozoda Jo‘rayeva.
Uchrashuvda, shuningdek, xorijiy boshqaruv kompaniyalarining O‘zbekistonda faoliyat yuritish tartibi, ko‘p qavatli uylarni boshqaruvga biriktirish mexanizmlari hamda boshqaruv tashkilotlari faoliyatiga qo‘yiladigan talablar yuzasidan fikr almashildi.
Tomonlar ko‘p qavatli uylarni boshqarish sohasida uzoq muddatli hamkorlikni rivojlantirish, istiqbolli investitsiya loyihalarini amalga oshirish va aholiga ko‘rsatilayotgan xizmatlar sifatini xalqaro standartlar asosida yanada oshirish bo‘yicha hamkorlikni davom ettirishga tayyor ekanliklarini bildirdilar.