O‘zbekiston va Jahon banki o‘rtasida issiqlik ta’minoti sohasidagi hamkorlik istiqbollari muhokama qilindi
2026-07-27 15:40:00 / Vazirlik yangiliklar
Bugun vazirlikda Jahon banki missiyasi vakillari bilan uchrashuv bo‘lib o‘tdi. Unda issiqlik ta’minoti sohasida amalga oshirilayotgan islohotlar, sohani modernizatsiya qilish, energiya samaradorligini oshirish hamda kelgusidagi hamkorlik yo‘nalishlari muhokama qilindi.
Ta’kidlanganidek, O‘zbekistonda issiqlik ta’minoti tizimini zamonaviy, barqaror va samarali tizimga aylantirish maqsadida keng ko‘lamli islohotlar amalga oshirilmoqda. Ushbu islohotlarning asosiy maqsadi aholiga ko‘rsatilayotgan xizmatlar sifatini oshirish, energiya yo‘qotishlarini kamaytirish va sohaning institutsional salohiyatini mustahkamlashdan iborat.
Uchrashuvda Jahon bankining sohadagi islohotlarni qo‘llab-quvvatlashdagi o‘rni, jumladan, moliyaviy va ekspertlik ko‘magi alohida qayd etildi. Shuningdek, “Program for Results” mexanizmini joriy etish istiqbollari, samaradorlik ko‘rsatkichlari va qo‘shma loyihalarni amalga oshirish bo‘yicha keyingi amaliy qadamlar muhokama qilindi.
Vazir o‘rinbosari Ozoda Jo‘rayeva ta’kidlaganidek, loyiha doirasida Toshkent shahridagi issiqlik ta’minoti tizimlarini kompleks o‘rganish, xususan, energiya auditi o‘tkazish, mavjud holatni baholash hamda energiya samaradorligini oshirish bo‘yicha takliflar ishlab chiqish muhim yo‘nalishlardan biridir. Shuningdek, markazlashgan issiqlik tarmoqlarida ichki muhandislik tarmoqlarini modernizatsiya qilish, zamonaviy texnologiyalarni joriy etish va xizmatlar sifatini oshirish sohani rivojlantirishning ustuvor vazifalaridan biri ekani qayd etildi.
Tomonlar issiqlik ta’minoti sohasidagi strategik hamkorlikni yanada rivojlantirish va qo‘shma tashabbuslarni samarali amalga oshirishga tayyor ekanliklarini bildirdilar.
O‘zbekiston va Jahon banki o‘rtasidagi hamkorlik mamlakatimizda zamonaviy, energiya tejamkor va samarali issiqlik ta’minoti tizimini shakllantirishga xizmat qiladi.