“Ijro.gov.uz” tizimi va ijro intizomini takomillashtirish masalalari muhokama qilindi
2026-07-22 22:00:00 / Vazirlik yangiliklar
21–22-iyul kunlari Qurilish va uy-joy kommunal xo‘jaligi vazirligida Hisob palatasi hamda Adliya vazirligi mas’ul xodimlari ishtirokida “Ijro.gov.uz” elektron tizimi va ijro intizomini takomillashtirish masalalari bo‘yicha o‘quv-amaliy seminar tashkil etildi.
Unda Qurilish va uy-joy kommunal xo‘jaligi vazirining birinchi o‘rinbosari J.Arashov, vazirlik mas’ullari, tizim tashkilotlari rahbarlari hamda hududiy boshqarmalar vakillari onlayn formatda ishtirok etdi.
Seminarda qonunchilik hujjatlari, O‘zbekiston Respublikasi Prezidenti hujjatlari, hukumat qarorlari va topshiriqlari ijrosini o‘z vaqtida hamda sifatli ta’minlash, shuningdek, ijro intizomini yanada mustahkamlash masalalari muhokama qilindi.
Tadbir davomida 2026-yilning birinchi yarim yilligi yakunlari tahlil qilinib, yo‘l qo‘yilgan kamchiliklar va ularni bartaraf etish choralari ko‘rib chiqildi. Shu bilan birga, uchinchi chorakda ijrosi belgilangan topshiriqlarni o‘z vaqtida va sifatli bajarish yuzasidan amaliy tavsiyalar berildi.
✅ Mutaxassislar tomonidan “Ijro.gov.uz” tizimida hujjatlar bilan ishlash, topshiriqlar ijrosini monitoring qilish, muddatlarni to‘g‘ri hisoblash, tasdiqlovchi hujjatlarni tizimga yuklash hamda amaliyotda uchrayotgan xatolarning oldini olish bo‘yicha batafsil tushuntirildi.
Yakunida ijro intizomini yanada mustahkamlash, topshiriqlar ijrosi ustidan doimiy monitoringni yo‘lga qo‘yish hamda “Ijro.gov.uz” elektron tizimidan samarali foydalanish yuzasidan tegishli tavsiya va ko‘rsatmalar berildi.