Bekobod tumanidagi maktab qurilishida sifat va mehnat xavfsizligi masalalari tanqidiy ko‘rib chiqildi
2026-07-07 09:30:00 / Vazirlik yangiliklar
Qurilish va uy-joy kommunal xo‘jaligi vaziri o‘rinbosari Toir Alimatov Toshkent viloyati Bekobod tumanidagi ijtimoiy soha obyektlarini o‘rganish doirasida tumandagi 10-sonli umumiy o‘rta ta’lim maktabida amalga oshirilayotgan qurilish ishlari bilan ham tanishdi.
Mazkur ta’lim muassasasida o‘quvchilar sig‘imini oshirish maqsadida 180 o‘rinli, ikki qavatli qo‘shimcha o‘quv binosi barpo etilmoqda. Vazir o‘rinbosari obyektda qurilish ishlari sifati, loyiha yechimlariga rioya etilishi hamda mehnatni muhofaza qilish talablarining bajarilishi yuzasidan mas’ullarning axborotini tingladi.
Obyektni ko‘zdan kechirish jarayonida ayrim kamchiliklarga e’tibor qaratildi. Jumladan, qurilish maydonida ishlayotgan xodimlarning maxsus ish kiyimlari bilan to‘liq ta’minlanmagani hamda qurilish chiqindilarining o‘z vaqtida olib chiqilmagani tanqid qilindi.
“Qurilish maydonida nafaqat ish sifati, balki mehnat xavfsizligi va tartib-intizom ham eng ustuvor masala bo‘lishi kerak. Ishchilar maxsus kiyim-bosh bilan ta’minlanishi, hudud ozoda saqlanishi va barcha ishlar belgilangan me’yorlar asosida tashkil etilishi shart,” — dedi vazir o’rinbosari.
Shuningdek, mas’ullarga aniqlangan kamchiliklarni qisqa muddatlarda bartaraf etish, qurilish ishlarini sifatli va belgilangan muddatlarda yakunlash yuzasidan tegishli topshiriqlar berildi.