O‘zbekiston qurilish sohasi xalqaro investorlar uchun yangi imkoniyatlar maydoniga aylanmoqda
2026-06-17 12:00:00 / Vazirlik yangiliklar
Sherzod Hidoyatov: O‘zbekiston qurilish sohasi xalqaro investorlar uchun yangi imkoniyatlar maydoniga aylanmoqda
Toshkentda bo‘lib o‘tayotgan V Toshkent xalqaro investitsiya forumi doirasida "The Investor" jurnalining maxsus soni omma e’tiboriga havola etildi. Nashr sahifalaridan O‘zbekiston Respublikasi Qurilish va uy-joy kommunal xo‘jaligi vaziri Sherzod Hidoyatovning intervyusi ham o‘rin oldi.
Unda mamlakatda uy-joy qurilishi, shaharsozlik, infratuzilma rivoji, Yangi Toshkent loyihasi hamda qurilish sohasida amalga oshirilayotgan islohotlarning investitsiyaviy ahamiyati haqida so‘z yuritildi.
Qayd etilishicha, 2025-yilda O‘zbekistonda 135 mingta xonadon qurilgan bo‘lsa, 2026-yilda 140 mingta yangi xonadon qurish va qurilish hajmini 30 trillion so‘mga yetkazish rejalashtirilgan.
Intervyuda Yangi Toshkent loyihasining iqtisodiy salohiyati, zamonaviy transport va muhandislik infratuzilmasi, shuningdek, qurilish jarayonlarini raqamlashtirish hamda investitsiya muhitini yanada takomillashtirish bo‘yicha amalga oshirilayotgan ishlar alohida ta’kidlandi.
Vazirning ta’kidlashicha, bugungi kunda O‘zbekiston qurilish sohasi nafaqat jadal o‘sib borayotgan bozor, balki aniq qoidalar, zamonaviy boshqaruv mexanizmlari va uzoq muddatli sheriklik tamoyillariga asoslangan investitsiya maydoni sifatida shakllanmoqda.