O‘zbekiston Respublikasi Iqtisodiyot va moliya vazirligi

Moliyaviy hisobotning halqaro standartlari (MHXS) yoʻnalishida:

1. 2025-yil III chorak yakunlariga koʻra:

buxgalterlarni xalqaro sertifikatlash doirasida talabgorlarning imtihon topshirish xarajatlarini qoplash boʻyicha 817 ta ariza koʻrib chiqilib, ulardan 425 nafari uchun 602,3 mln soʻm qoplab berildi;

jami 218 nafar tinglovchilarni oʻqitish xarajatlarini qoplash boʻyicha 5 ta oʻquv markazdan kelib tushgan 15 ta ariza koʻrib chiqildi, shundan, jami 7 ta arizadagi 141 nafar tinglovchilarni oʻqitish xarajatlari uchun 626,4 mln soʻm qoplab berildi.

2. ACCA (Association of Chartered Certified Accountants) bilan oʻzaro hamkorlik jarayonida 19 ta oʻquv markazlari xalqaro akkreditatsiyadan muvaffaqiyatli oʻtdi.

3. Moliyaviy hisobotning xalqaro standartlarini oʻqitish boʻyicha ikki bosqichli bepul masofaviy onlayn taʼlim platformasida (ifrs.academy) 13 000 dan ortiq tinglovchilar, talabalar, oʻqituvchilar, buxgalterlar va moliyachilar ushbu platformalarda taʼlim olmoqda.

4. Oʻqitish va buxgalterlarni xalqaro sertifikatlash doirasida imtihon topshirish xarajatlarini qoplash boʻyicha va davlat organlari bilan oʻzaro hamkorligi sohasiga axborot kommunikatsiya texnologiyalarini joriy etish boʻyicha “MHXS” dasturiy majmuasi tayyorlanib, 1-yanvardan ishga tushirildi.

Auditorlik faoliyati sohasida:

1. Respublikamizda auditorlik xizmatlari bozorining umumiy tavsifiga koʻra, 2025-yil 30-sentabr holatida auditorlik tashkilotlarining soni 167 ta, auditor malaka sertifikatiga ega boʻlganlar soni 1264 nafarga yetdi.

2. Auditorlik tashkilotlari faoliyatining shaffofligini taʼminlash va ularni davlat organlari bilan oʻzaro hamkorligi sohasiga axborot-kommunikatsiya texnologiyalarini joriy etish boʻyicha “Audit” dasturiy majmuasi ishlab chiqildi va amaliyotga joriy etildi. Hozirgi vaqtda “Audit” dasturiy majmuasi http://audit.mf.uz va https://audit.imv.uz veb-sahifalarida ishlab kelmoqda.

3. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurollarini tarqatishni moliyalashtirishga qarshi kurashish masalalari boʻyicha:

2025-yil yanvar oyidan boshlab Iqtisodiy jinoyatlarga qarshi kurashish departamenti bilan birgalikda jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish (JFODL/TM/OQQTMQK) milliy tizimini oʻzaro baholashning 3-raundiga tayyorgarlik koʻrish boʻyicha ishlar olib borilmoqda. JFODL/TM/OQQTMQK boʻyicha Idoralararo komissiyaning bayonnomasi bilan tasdiqlangan “Yoʻl xaritasi” va Chora-tadbirlar rejasi doirasida qator ishlar amalga oshirilmoqda va shu toʻgʻrisida 2025-yilning yanvar–sentabr oylari uchun hisobot tayyorlandi.

4. Iqtisodiyot va moliya vazirligining Audit xalqaro standartlarining (AXS) davlat tilidagi matnini koʻrib chiqish Komissiyasining ish reglamenti tasdiqlanib, mazkur Komissiya tarkibiga sohaning yetakchi mutaxassislari kiritildi.

Shuningdek, Jahon banki tomonidan moliyalashtirilayotgan Institutsional salohiyatni oshirish (ICBP) loyihasi doirasida AXSni tarjima qilish boʻyicha tadbirlar oʻtkazilmoqda.

  Ishlab chiqilgan normativ-xuquqiy hujjatlar:

1. Buxgalteriya hisobi sohasini tizimlashtirish, Moliyaviy hisobotning xalqaro standartlariga (MHXS) oʻtishni ragʻbatlantirish va tadbirkorlik subyektlarining MHXSga oʻtishi uchun qoʻshimcha shart-sharoitlar yaratish, moliyaviy hisobotning tashqi sifat nazorati tizimlarini takomillashtirish, shuningdek, buxgalterlar va auditorlar kasbining huquqiy maqomi va nufuzini mustahkamlash, ularning kasbiy odob-axloq talablariga rioya qilishi, buxgalterlik va auditorlik xizmatlari sifatini xalqaro standartlar asosida taʼminlash, buxgalteriya hisobi va audit sohasini raqamlashtirish orqali rivojlantirish maqsadida Oʻzbekiston Respublikasi Prezidentining “Moliyaviy hisob tizimini xalqaro talab va standartlarga muvofiq tubdan takomillashtirish chora-tadbirlari toʻgʻrisida” qarori loyihasi ishlab chiqilib, 2025-yil 15-sentabrdagi PQ-282-sonli Qaror qabul qilindi.

2. Moliyaviy hisobotning xalqaro standartlarini (MHXS) joriy etishga doir ishlar amalga oshirilmoqda. Ushbu islohotlarni izchil davom ettirish, shu bilan birgalikda MHXSni joriy etish jarayonini muvofiqlashtirish va metodologik taʼminlash hamda tadbirkorlik subyektlarini qoʻllab-quvvatlash va yengillik yaratish maqsadida:

Oʻzbekiston Respublikasi Iqtisodiyot va moliya vazirligining ayrim idoraviy normativ-huquqiy hujjatlariga qoʻshimchalar kiritish haqida (Adliya vazirligi tomonidan 2025-yil 11-fevralda roʻyxatdan oʻtkazildi, roʻyxat raqami 3607) buyrugʻi qabul qilindi, unga asosan:

• Buxgalteriya hisobining milliy standarti (4-sonli BHMS) “Tovar-moddiy zaxiralar”;
• Buxgalteriya hisobining milliy standarti (5-sonli BHMS) “Asosiy vositalar”;
• Buxgalteriya hisobining milliy standarti (7-sonli BHMS) “Nomoddiy aktivlar”ga tegishli oʻzgartirish va qoʻshimchalar kiritildi.

Iqtisodiyot va moliya vazirligi

Axborot xizmati