Mazkur qaror davlat xaridlari jarayonida sunʼiy intellekt texnologiyalaridan foydalanishni kengaytirish, elektron tizimlar samaradorligini oshirish hamda shaffoflik va jamoatchilik nazoratini kuchaytirishga qaratilgan.

Hujjatga muvofiq quyidagilar joriy etiladi:

· “Business intelligence” tizimi (sohalar va hududlar kesimida xaridlar maʼlumotlarini tahlil qilish hamda jamoatchilik uchun qulay taqdim etish);

· “Risk management” tizimi (xarid jarayonida xavflarni boshqarishning kompleks tizimi);

· import qilinishi rejalashtirilgan mahsulotlarni ochiqlash tizimi.

Shu bilan birga, tadbirkorlik subyektlari uchun qulaylik yaratish maqsadida ularni davlat roʻyxatidan oʻtkazilishida ixtiyoriy ravishda barcha davlat xaridlari elektron tizimlarida bir vaqtning oʻzida roʻyxatdan oʻtkazish imkoniyati paydo boʻladi.

Bundan tashqari, shartnomalar ijrosi moduli yaratiladi hamda unda, jumladan, davlat buyurtmachilarining ichki audit tuzilmalari tomonidan davlat xaridlari boʻyicha monitoring natijalarini jamoatchilikka keng yoritilishi yoʻlga qoʻyiladi.

Bugunga qadar elektron doʻkon va auksion savdolari natijasida shartnomalar elektron tuzilgan boʻlsa, endilikda barcha xarid shartnomalari elektron tizimda avtomatik tarzda shakllantirilishi va tuzilishi belgilandi.

Shuningdek, qaror bilan Davlat xaridlari elektron tizimi operatorlari toʻgʻrisidagi nizom tasdiqlandi.

Iqtisodiyot va moliya vazirligi

Axborot xizmati