Ushbu qaror bilan quyidagilar tasdiqlandi:

I. 2025 – 2027-yillarda respublika va mahalliy ijro etuvchi hokimiyat organlarida ichki nazorat tizimini yanada takomillashtirish konsepsiyasi hamda uni amalga oshirish yuzasidan “Yoʻl xaritasi”.

Mazkur konsepsiyada quyidagilar nazarda tutilgan:

davlat sektorida ichki nazorat tizimini rivojlantirish boʻyicha xalqaro tajriba va mamlakatimizdagi joriy holat;

nazorat muhitining yaxlit tizimini shakllantirish va xavflarni boshqarishning samarali tizimini joriy etish;

nazorat jarayonlarining natijadorligini oshirish va axborot-kommunikatsiya tizimini takomillashtirish;

ichki nazorat tizimini doimiy monitoring qilish hamda hisobdorlikni yanada mustahkamlash;

ichki nazorat tizimini tashkil etishni standartlashtirish maqsadida qonunchilik asoslarini takomillashtirish;

ichki nazorat tizimini tashkil etish hamda xodimlarni tayyorlash, qayta tayyorlash va ularning malakasini oshirish tizimini rivojlantirish.

Shuningdek, Konsepsiyada ilgʻor xalqaro tajribalar sifatida “Ichki nazorat – integratsiyalashgan modeli” va “Uch boʻgʻinli himoya” modellari keltirilgan.

Maʼlumot uchun,“Ichki nazorat – integratsiyalashgan modeli” Tredvey komissiyasining homiylik tashkilotlari qoʻmitasi (COSO) tomonidan ishlab chiqilgan (ushbu model bilan tashkilotning rasmiy saytida batafsil tanishishingiz mumkin: https://www.coso.org).

“Uch boʻgʻinli himoya” modeli Xalqaro Ichki auditorlar instituti tomonidan ishlab chiqilgan hamda ichki nazoratni taʼminlashda keng tarqalgan va samarali tatbiq etilgan model hisoblanadi (ushbu model bilan tashkilotning rasmiy saytida batafsil tanishishingiz mumkin: https://www.theiia.org).

II. Ichki audit faoliyatining takomillashtirilishi munosabati bilan Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar.

Qaror bilan kiritilayotgan oʻzgartirish va qoʻshimchalar tarkibidan quyidagilar oʻrin olgan:

davlat organlari va tashkilotlarining ichki audit xizmatlariga ajratiladigan eng kam shtat birliklari sonini aniqlash tartibi;

davlat organlari va tashkilotlarda ichki audit xizmatlari rahbarlari mustaqilligini yanada oshirish maqsadida ularni lavozimdan ozod etishni kelishish tartibi;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida tashkil etilgan ichki audit xizmatlari faoliyatini huquqiy tartibga solish;

ichki audit xizmatlari faoliyatini baholashni namunaviy savolnomani kengashtirish orqali yanada takomillashtirish;

ichki audit milliy malaka sertifikatini berish tizimida malaka oshirishning yangilangan muddatlarini belgilash;

ichki audit faoliyatiga oid normativ-huquqiy hujjatlarni amaldagi qonunchilik hujjatlarga muvofiqlashtirish maqsadida kiritilayotgan boshqa oʻzgartirishlar.

Mazkur qaror bilan batafsil quyidagi havola orqali tanishishingiz mumkin:

https://lex.uz/uz/pdfs/-7632930

Iqtisodiyot va moliya vazirligi

Axborot xizmati