O‘zbekiston Respublikasining “Issiqxona gazlarining chiqarilishini cheklash to‘g‘risida”gi O‘RQ-1073-sonli Qonuni qabul qilindi
2025-07-08 22:20:00 / Vazirlik yangiliklari
Qonun 6 bob, 29 ta moddadan iborat.
Mazkur Qonun bilan issiqxona gazlari chiqarilishini cheklashning asosiy prinsiplari, qisqartirilgan issiqxona gazlariga egalik munosabatlari, issiqxona gazlari chiqarilishini cheklash sohasidagi davlat organlarining vakolatlari hamda issiqxona gazlarining chiqarilishi hisobini davlat tomonidan yuritish tartib-qoidalari belgilandi.
Bundan tashqari qonunda:
· issiqxona gazlarining chiqarilishini qisqartirish maqsadli ko‘rsatkichlari ishlab chiqilishi;
· yuridik shaxslar, yakka tartibdagi tadbirkorlar va jismoniy shaxslar tomonidan amalga oshirilayotgan loyihalarni “yashil” loyihalar jumlasiga kiritish mezonlari va tartibi O‘zbekiston Vazirlar Mahkamasi tomonidan belgilanishi;
· uglerod birliklarining reyestri yuritilishi;
· issiqxona gazlarining chiqarilishi monitoringi, hisoboti va verifikatsiyasi (MRV) tizimi joriy etilishi;
· yuridik shaxslarning va yakka tartibdagi tadbirkorlarning issiqxona gazlari chiqarilishini cheklash sohasidagi huquq va majburiyatlari nazarda tutilmoqda.
Qonun loyihasining qabul qilinishi mamlakatimizda issiqxona gazlari chiqarilishini kamaytirish va xalqaro bozorlarda buning natijasida hosil bo‘ladigan uglerod birliklari savdosini yo‘lga qo‘yishni tartibga solish hamda O‘zbekistonning BMT Iqlim o‘zgarishi bo‘yicha hadli Konvensiyasi doirasida tuzilgan Parij bitimiga muvofiq olingan majburiyatlarini bajarish imkonini beradi.
Ma’lumot uchun: O‘zbekiston Respublikasi Parij bitimi doirasida issiqxona gazlarining yalpi ichki mahsulot birligiga nisbatan solishtirma ajratmalarini 2030-yilga kelib, 2010-yildagi darajaga nisbatan 35 foizga qisqartirish majburiyatini olgan.
Bunda, Iqtisodiyot va moliya vazirligi issiqxona gazlarining chiqarilishini cheklash, respublika hamda xalqaro darajada uglerod birliklari savdosini amalga oshirish, shuningdek, xalqaro va ichki uglerod bozoriga yo‘naltiriladigan uglerod birliklari reyestrini shakllantirishda vakolatli organ etib belgilandi.
Iqtisodiyot va moliya vazirligi
Axborot xizmati