GFPP yordamida Oʻzbekistonda barqaror infratuzilmani rivojlantirish va xususiy sektor ishtirokini kengaytirish yuzasidan amalga oshirish boʻyicha ishlar
2025-07-03 17:15:00 / Vazirlik yangiliklari
Oʻzbekistonda ushbu jamgʻarma infratuzilma sohasiga, jumladan, qayta tiklanuvchi energiya, batareyali energiya saqlash tizimlari (BESS) va boshqa muhim infratuzilma loyihalariga xususiy investitsiyalarni jalb qilishni qoʻllab-quvvatlash maqsadida Hukumat tomonidan yaratilayotgan Risklarni kamaytirish jamgʻarmasi (RMF)ni tashkil etish boʻyicha saʼy-harakatlarga koʻmaklashmoqda.
GFPP mablagʻlari hisobidan ajratilgan 2 million AQSH dollari miqdoridagi granti — RMFni loyihalash, tuzilmani ishlab chiqish va operatsion rejalashtirish ishlarini amalga oshirish imkonini beradi.
RMF yagona platforma sifatida Xalqaro tiklanish va taraqqiyot banki (IBRD) kafolat vositalarini samarali va tizimli ravishda qoʻllashni maqsad qilgan. Ushbu kafolatlar davlatga tasarrufidagi tashkilotlarning shartnomaviy majburiyatlari bajarilishini qoʻllab-quvvatlash orqali xususiy investorlar uchun mavjud xatarlarni kamaytiradi va davlat-xususiy sheriklik asosidagi infratuzilma loyihalarining moliyaviy jozibadorligini oshiradi.
Oʻzbekistonning quyosh energiyasi, energiya saqlash tizimlari va samarali energiya ishlab chiqarish boʻyicha Jahon banki koʻmagida amalga oshirilgan davlat-xususiy sheriklik (PPP) loyihalaridagi ilgʻor tajribasi asosida bu jamgʻarma keng koʻlamli va samarali moliyaviy mexanizm sifatida xizmat qiladi. U xususiy sektor sarmoyasini infratuzilma sohasiga keng jalb qilishga xizmat qilib, davlatning 2030-yilgacha 20 GW dan ortiq qayta tiklanuvchi energiya quvvatlarini rivojlantirishga doir quvvat xarid qilish shartnomalari (PPA), umumiy bitimlar va anglashuv memorandumlari doirasidagi majburiyatlarini amalga oshirishda yordam beradi. Shuningdek, RMF mamlakatning uglerod neytralligiga erishish va barqaror rivojlanish maqsadlariga muvofiq boshqa sohalardagi infratuzilma loyihalarini ham qoʻllab-quvvatlaydi.
GFPP tomonidan moliyalashtirilayotgan faoliyatlarga quyidagilar kiradi: RMFning texnik loyihasi, xavf va ekologik-ijtimoiy baholash, moliyaviy va institutsional tuzilmasini ishlab chiqish, loyihalar portfelini shakllantirish, tegishli vazirlik va idoralarning salohiyatini oshirish. Ushbu chora-tadbirlar jamgʻarmaning xalqaro ilgʻor tajribalarga muvofiq ishlab chiqilishi va kelgusida Jahon banki tomonidan qoʻllab-quvvatlanadigan dasturlar doirasida faoliyat yuritishga toʻliq tayyor boʻlishini taʼminlaydi.
Shu orqali RMF xususiy sektor ishtirokini yanada chuqurlashtirish, kreditni kafolatlash mexanizmlarini mustahkamlash va Oʻzbekistonning uzoq muddatli rivojlanish kun tartibini qoʻllab-quvvatlovchi barqaror infratuzilma yechimlarini taqdim etuvchi muhim vosita boʻlib xizmat qiladi.
Grant loyihasini amalga oshirish doirasida Iqtisodiyot va moliya vazirligi RMF Jahon bankining Ekologik va ijtimoiy siyosati (ESF)ga muvofiq ishlab chiqilishi va amalga oshirilishini taʼminlash boʻyicha majburiyatlarini bayon qiluvchi Ekologik va ijtimoiy majburiyatlar rejasini (ESCP) jamoatchilikka eʼlon qilmoqda.
Iqtisodiyot va moliya vazirligi
Axborot xizmati