O‘zbekiston Respublikasi Iqtisodiyot va moliya vazirligi

Mazkur tadbirda O‘zbekiston va Rossiya moliya vazirliklari vakillari, shuningdek, Rossiya Federatsiyasi Moliya vazirligi huzuridagi Ilmiy-tadqiqot moliya instituti, Davlat budjet siyosati departamenti hamda Budjet-soliq ilmiy tadqiqotlar instituti ekspertlari ishtirok etdi. Seminarni dastur eksperti Sergey Sudakov boshqarib bordi. Umumiy hisobda 100 dan ortiq ishtirokchi qatnashdi.

Seminarning birinchi qismida dastur eksperti Antonina Kovalevskaya “O‘zbekiston Respublikasi budjet ma’lumotlarining ochiqligini oshirish bo‘yicha Yo‘l xaritasi” mavzusida taqdimot o‘tkazdi. Taqdimot davomida u Iqtisodiyot va moliya vazirligi tomonidan budjet ma’lumotlari ochiqligini baholash indeksini joriy etish yo‘lida amalga oshirilayotgan ishlanmalarni namoyish etdi. Jumladan, ishlab chiqilayotgan modellarning mahalliy sharoitga moslashtirilishi va ularni amaliyotga tadbiq qilishda xodimlarning salohiyatini oshirishga alohida e’tibor qaratildi. Mazkur yo‘nalishda amalga oshiriladigan keyingi bosqichdagi ishlar bo‘yicha rejalar muhokama qilindi.

Tadbirning ikkinchi qismida ikki tomonlama dastur eksperti Yana Polyakova “Submilliy darajada budjet va budjet jarayonining ochiqlik darajasini oshirish bo‘yicha tavsiyalar: O‘zbekiston tajribasi” mavzusida ma’ruza qildi. U o‘z nutqida budjet siyosatining ustuvor maqsadi mamlakat iqtisodiy o‘sishini ta’minlash ekanligini ta’kidladi. Shu jihatdan federal budjet muvozanati va inflyatsiyaning past darajasi muhim omillar sifatida qayd etildi. Shuningdek, u byudjet prognozini shakllantirishda qo‘llanilayotgan yondashuvlar, asosiy fiskal xatarlarni stress-testdan o‘tkazish, hamda soliq imtiyozlari xarajatlarini boshqarish mexanizmlari haqida batafsil ma’lumot berdi.

Seminar yakunida 2025–2026-yillarda O‘zbekiston Respublikasi Iqtisodiyot va moliya vazirligining Xalqaro Budjet ochiqligi tashabbusi (International Budget Partnership — IBP)ga a’zo bo‘lishi masalasi yuzasidan ham fikr almashildi.

Iqtisodiyot va moliya vazirligi

Axborot xizmati