Germaniya taraqqiyot banki vakillari bilan hamkorlik istiqbollari yuzasidan fikr almashildi
2025-04-17 20:20:00 / Vazirlik yangiliklari
Uchrashuvda Germaniyaning O‘zbekistondagi elchixonasi vakili Maykl Vimmer, “KfW” bankining O‘zbekistondagi vakolatxonasi rahbari Andreas Shnayder hamda Iqtisodiyot va moliya vazirligining Kichik va oʻrta biznes rivojlanishini tahlil qilish, qoʻllab-quvvatlash va davlat siyosatini muvofiqlashtirish departamenti direktori Timur Xusanov, Davlat qarzi departamenti direktori o‘rinbosari Bexruz Karimov va boshqa mas’ul vakillar ishtirok etdi.
Ma’lumot uchun: Germaniyaning “KfW” banki davlat rivojlantirish banklaridan biri bo‘lib, u iqtisodiy taraqqiyot, ijtimoiy barqarorlik va ekologik barqarorlikni qo‘llab-quvvatlash uchun moliyalashtirish xizmatlarini taqdim etadi. Bank rivojlanayotgan davlatlarga yordam beradi hamda energiya, iqlim, suv, ta'lim, sog‘liqni saqlash, va boshqalar bo‘yicha loyihalarni moliyalashtiradi. Shuningdek, bank BMTning barqaror rivojlanish maqsadlariga (SDGs) hissa qo‘shish maqsadida faoliyat olib boradi.
Muloqot davomida tomonlar kichik va o‘rta tadbirkorlikni rivojlantirish yuzasidan olib borilayotgan islohotlar, kichik va o‘rta biznesni moliyaviy jihatdan qo‘llab-quvvatlash hamda tadbirkorlik subyektlari uchun qulay moliyaviy sharoitlar yaratishda hamkorlikni kengaytirish masalalari yuzasidan muhokamalar olib bordi.
Shuningdek, muhokamalar davomida tomonlar mamlakatimizda iqtisodiy o‘sish jarayonlari, qishloq xo‘jaligi va hududlarni rivojlantirish yuzasidan amalga oshirilayotgan ishlar hamda kapital va moliya bozorlarini rivojlantirish yuzasidan fikr almashdi.
Shu bilan birga, uchrashuv doirasida Germaniya taraqqiyot banki ishtirokida “Mikro, kichik va oʻrta biznesni rivojlantirish” loyihasining III-fazasi yuzasidan 23,5 mln yevro kredit va 3 mln yevro grant mablag‘larini jalb qilish bo‘yicha bitim imzolandi.
Ma’lumot uchun: Germaniya taraqqiyot banki ishtirokida “Mikro, kichik va o‘rta biznesni rivojlantirish” loyihasining asosiy maqsadi O‘zbekistonda kichik va o‘rta biznes subyektlarining barqaror rivojlanishini qo‘llab-quvvatlash, ularning moliyaviy resurslar va zamonaviy bilimlarga bo‘lgan ehtiyojlarini qondirish, shuningdek, raqobatbardoshligini oshirish orqali iqtisodiy o‘sishga va aholi bandligini ta’minlashga qaratilgan.
Muzokaralar yakunida tomonlar o‘zaro hamkorlik aloqalarini rivojlantirish va mustahkamlash hamda yuqorida qayd etilgan masalalar yuzasidan fikrlar almashinuvi jarayonlarini kengaytirishga kelishib oldi.
Iqtisodiyot va moliya vazirligi
Axborot xizmati