Sun’iy intellekt texnologiyalari bo‘yicha o‘quv mashg‘ulotlari o‘tkazildi
2025-04-10 16:20:00 / Vazirlik yangiliklari
O‘qitish jarayoni Oʻzbekiston Respublikasi Prezidentining “Sunʼiy intellekt texnologiyalarini 2030-yilga qadar rivojlantirish strategiyasini tasdiqlash toʻgʻrisida”gi 2024-yil 14-oktabrdagi PQ–358-son qarorining 2-ilovasi 19-bandi hamda Iqtisodiyot va moliya vazirining 2025-yil 5-apreldagi 23-81-son buyrug‘i ijrosi doirasida bo‘lib, Raqamli texnologiyalar vazirligi bilan hamkorlikda amalga oshirildi. 123 nafar vazirlik xodimi 4 soatlik o‘quv kurslarini muvaffaqiyatli tamomladi. Mazkur ishtirokchilarga sertifikatlar berildi.
O‘quv mashg‘ulotlarida vazirlik xodimlari ilg‘or sun’iy intellekt platformalari (chatgpt.com, gamma.app, gemini.google.com, claude.ai, chat.mistral.ai, perplexity.ai, sora.com, klingai.com, leonardo.ai, heygen.com, tactiq.io, youtube.com, grok.com hamda chat.deepseek.com) bilan tanishdi va ulardan amaliy faoliyatda foydalanish bo‘yicha dastlabki bilim va ko‘nikmalarni egalladi.
Iqtisodiyot va moliya vazirligi sun’iy intellekt sohasida yetakchi bilim va ko‘nikmalarga ega bo‘lgan professional kadrlar tayyorlash orqali zamonaviy iqtisodiy islohotlarning faol ishtirokchisiga aylanishni maqsad qilgan.
Iqtisodiyot va moliya vazirligi
Axborot xizmati