O‘zbekiston Respublikasi Iqtisodiyot va moliya vazirligi

Seminar-treningdan koʻzlangan asosiy maqsad Davlat dasturlarini moliyalashtirishni qoʻllab-quvvatlash maqsadida Jahon banki tomonidan foydalaniladigan yangi moliyalashtirish mexanizmi — “Natijaga asoslangan kreditlash dasturi” bilan yaqindan tanishtirish hisoblanadi.

Seminar-trenigda Iqtisodiyot va moliya vazirligi, Investitsiyalar, sanoat va savdo vazirligi, Sogʻliqni saqlash vazirligi, Ekologiya, atrof-muhitni muhofaza qilish va iqlim oʻzgarishi vazirligi, Qurilish va uy-joy kommunal xoʻjaligi vazirligi, Energetika vazirligi, Qishloq xoʻjaligi vazirligi, Suv xoʻjaligi vazirligi, Transport vazirligi va Hisob palatasining 40 dan ortiq masʼul mutaxassislari ishtirok etdi.

Seminarni Jahon bankining Markaziy Osiyo mintaqasi bo‘yicha operatsion menejeri Indu Jon-Abraham hamda Iqtisodiyot va moliya vaziri o‘rinbosari Ilhomjon Umrzakov ochib berishdi.

Tadbirning birinchi kunida “Natijaga asoslangan kreditlash dasturi” mazmuni va mohiyati, uning anʼanaviy moliyalashtirish usullaridan farqi, shuningdek, Xitoy, Marokash va Serbiya davlatlari misolida xalqaro tajriba boʻyicha tushuntirish va maʼlumotlar berib oʻtildi.

Seminar maʼruzalari Kay-Aleksander Kayzer boshchiligidagi Jahon banki ekspertlari tomonidan taqdimotlar tarzida olib borildi va ishtirokchilarni qiziqtirgan savollarga atroflicha javob berildi.

Seminarning ikkinchi kunida ham qizgʻin savol-javoblar va muhokamalar davom etdi. Jumladan, “Natijaga asoslangan kreditlash dasturi” doirasida Oʻzbekiston Respublikasida amalga oshirilayotgan dasturlar, ularni baholash mezonlari (texnik baholash, ishonchli moliyaviy boshqaruv tizimlarni baholash, atrof-muhit va ijtimoiy tizimlarni baholash) va erishilishi kutilayotgan natijalar boʻyicha fikrlar almashildi.

Shuningdek, ishtirokchilar tomonidan Oʻzbekiston Respublikasida sogʻliqni saqlash, qishloq xo‘jaligi va energetika sohalaridagi loyihalarni “Natijaga asoslangan kreditlash dasturi” doirasida moliyalashtirish imkoniyatlari muhokama qilindi.

Uchrashuv yakunida tomonlar amalga oshirilishi boshlangan va kelgusidagi rivojlantirish dasturlarini moliyalashtirish masalalarida hamkorlikni yanada yuksaltirishga kelishib oldi.

Iqtisodiyot va moliya vazirligi

Axborot xizmati