Samarqand viloyatida navbatdagi sayyor qabul oʻtkazildi
2025-03-17 11:05:00 / Vazirlik yangiliklari
Sayyor qabulda Iqtisodiyot va moliya vazirligi markaziy apparati, Samarqand viloyatining Iqtisodiyot va moliya bosh boshqarmasi, Gʻaznachilik xizmati boshqarmasi, Budjetdan tashqari Pensiya jamgʻarmasi, Kadastr agentligi, Samarqand shahar va tuman Iqtisodiyot va moliya boʻlimi rahbar va mas’ullari hamda mahalliy hokimiyat mutasaddilari ishtirok etdi.
Ochiq muloqot shaklida tashkil etilgan qabulda 130 nafarga yaqin fuqaroning murojaatlari tinglandi. Mazkur murojaatlarning aksariyati uy-joyga muhtoj oilalar tomonidan imtiyozli kredit asosida turar-joy xarid qilish uchun subsidiyalar ajratilishi, ijtimoiy soha masalalari (sog‘liqni saqlash, maktab va maktabgacha ta’limga oid), davlat budjeti mablag‘larining yo‘naltirilishi (“Tashabbusli budjet”, ko‘p qavatli uylarning fasad qismini ta’mirlash uchun ajratilgan ssuda mablag‘i hisobidan qarzdorlikni qoplash) hamda kadastr faoliyati bilan bog‘liq masalalarga oid boʻlib, ularning aksariyati joyida o‘z yechimini topdi.
Sayyor qabul davomida har bir murojaat tegishli boshqarma va tashkilot rahbarlari ishtirokida koʻrib chiqilib, 28 tasi mutaxassislar boshchiligida joyida ijobiy hal etildi, 54 ta murojaat yuzasidan huquqiy tushuntirish berildi. Shuningdek, oʻrganish va qonuniy hal etish uchun qoʻshimcha muddat talab etiladigan 48 ta murojaat boʻyicha tegishli idoralarning mutasaddilari zimmasiga aniq vazifalar yuklandi.
Iqtisodiyot va moliya vazirligi
Axborot xizmati