O‘zbekiston Respublikasi Iqtisodiyot va moliya vazirligi

Ushbu hamkorlik ayniqsa, yurtimizda 2025-yil “Atrof-muhitni asrash va “yashil” iqtisodiyot yili” deb e’lon qilinishi fonida o‘z dolzarbligini yanada oshirmoqda.

Shu munosabat bilan, joriy yilning 27-fevralida O‘zbekiston Respublikasi Iqtisodiyot va moliya vazirligi tomonidan Yaponiya Atrof-muhit vazirligi, Iqtisodiyot, savdo va sanoat vazirligi hamda Yaponiyaning Atrof-muhit bo‘yicha xalqaro hamkorlik markazi bilan hamkorlikda Toshkent shahrida “O‘zbekistonda Qo‘shma moliyalash mexanizmi (Joint Crediting Mechanism – JCM) imkoniyatlari” mavzusida seminar bo‘lib o‘tdi.

Maʼlumot uchun: Qo‘shma moliyalash mexanizmi (Joint Crediting Mechanism – JCM) – rivojlanayotgan mamlakatlarda JCM loyihalari doirasida qisqartirilgan issiqxona gazi emissiyalarining maʼlum bir qismi evaziga loyiha turi va shartlariga qarab Yaponiyaning zamonaviy texnologiyalarini jalb qilish yoki loyiha xarajatlarining bir qismini qoplab berish bo‘yicha hamkorlik tizimi.

Mazkur seminarda Yaponiya Hukumati, Yaponiyaning qayta tiklanuvchi energiya hamda toza texnologiyalarni ishlab chiqarish bo‘yicha yetakchi kompaniyalari, shuningdek, O‘zbekistonning mahalliy vazirlik va idoralari, yirik sanoat korxonalari, energetika tizim tashkilotlari, xususiy sektor vakillari va ilmiy-tadqiqot institutlarining 150 dan ortiq vakillari ishtirok etdi.

Ushbu seminardan asosiy maqsad JCM mexanizmi orqali tadbirkorlarni yashil iqtisodiyotga o‘tishda qo‘llab-quvvatlash, Yaponiyaning ilg‘or yashil texnologiyalarini jalb etish hamda Yapon va O‘zbek kompaniyalari o‘rtasida B2B muzokaralarni o‘tkazish imkoniyatini yaratishdir.

Seminar davomida, Yaponiyaning JCM Jamg‘armasi, JCMning asosiy ishlash sxemasi, mahalliy tadbirkorlar uchun JCM loyihasini ishlab chiqish tartibi, JCM doirasida amalga oshirilayotgan loyihalar va xorijiy tajribalar to‘g‘risida taqdimotlar qilindi. Xususan:

·    Oʻzbekistonning kam uglerodli rivojlanish siyosati va JCM loyihasini ishlab chiqish uchun potensial sektorlar;

·    Oʻzbekistonda Ixtiyoriy uglerod bozori doirasida amalga oshirilayotgan ishlar va loyihalar;

·    Qoʻshma moliyalash mexanizmining (JCM) asosiy sxemasi va soʻnggi oʻzgarishlar;

·    Mahalliy hamkorlar uchun JCM loyihasini ishlab chiqishda asosiy jihatlar;

·    Qishloq xoʻjaligi yer maydonlarida quyosh panellarini oʻrnatish (agrivoltaika) boʻyicha yetakchi innovatsiyalar;

Markazlashgan isitish va sovutish tizimlarida issiqlik nasoslaridan foydalanish va boshqa yo‘nalishlarda taqdimotlar asosida batafsil tushuntirishlar berildi.

Iqtisodiyot va moliya vazirligi

Axborot xizmati