Turkiya bilan sog‘liqni saqlash sohasida hamkorlikni rivojlantirish masalalari muhokama qilindi
2025-01-17 20:25:00 / Vazirlik yangiliklari
Turkiya tomoni sog‘liqni saqlash sohasini raqamlashtirish, tibbiy sug‘urta tizimi, tibbiy xizmatlar ro‘yxatini kodlash, dori-darmonlar ta’minoti va ularni nazorat qilish sohasida o‘z tajribalarini taqdimot qilishdi. Xususan, sog‘liqni saqlash sohasida moliyaviy boshqaruvni takomillashtirish, dori-darmon ehtiyojlarini onlayn nazorat qilish va tibbiy sug‘urta tizimini yanada rivojlantirish bo‘yicha samarali mexanizmlar ko‘rib chiqildi.
O‘zbekiston tomoni Turkiya tajribasini o‘rganish va uni mamlakatimizda sog‘liqni saqlash tizimini moliyalashtirish va boshqaruv tizimini takomillashtirish jarayonida qo‘llash tashabbusini qo‘llab-quvvatladi. Xususan, tibbiy xizmatlar ko‘rsatish sifatini yaxshilash maqsadida sog‘liqni saqlash sohasiga ajratilayotgan mablag‘lardan oqilona foydalanish yuzasidan fikr almashildi.
Shuningdek, muzokaralarda shifoxonalardagi ma’lumotlarni onlayn kuzatish, dori-darmon ehtiyojlarini prognozlash va monitoring qilish, ma’lumotlar almashinuvini ta’minlash uchun raqamlashtirishni jadallashtirish juda muhimligiga e’tibor qaratildi. Ushbu yondashuv tizim boshqaruvini optimallashtirish va ajratilayotgan mablag‘larning samaradorligini oshirishga imkon beradi.
Muzokaralar yakunida tomonlar sog‘liqni saqlash sohasida qo‘shma tashabbuslarni amalga oshirish va ushbu yo‘nalishda tizimli hamkorlikni rivojlantirish bo‘yicha kelishuvga erishdi. Mazkur hamkorlik tizimni moliyalashtirish mexanizmlarini takomillashtirish orqali aholiga ko‘rsatilayotgan xizmatlar sifatini oshirishga ko‘mak beradi.
Iqtisodiyot va moliya vazirligi
Axborot xizmati