18-dekabrdan boshlab, loyiha doirasida taklif kiritish jarayoni boshlandi. Bunda, 5-sinfdan 11-sinfgacha boʻlgan har bir oʻquvchi faqatgina oʻzi taʼlim olayotgan umumtaʼlim maktablarini jihozlash yoki qurilish-taʼmirlash ishlarini amalga oshirishga doir loyihalarni ilgari surishi mumkin.

Oʻquvchilar loyihalarini sinf rahbarlari koʻmagida oʻzining telefon, planshet qurilmalari yoki maktabdagi mavjud kompyuter va noutbuklardan foydalangan holda kiritadi. Oʻquvchilarga qulaylik yaratish maqsadida maktab rahbariyati tomonidan loyihalarni shakllantirish va Portalga kiritish uchun internet aloqasi mavjud kompyuterlar bilan jihozlangan informatika xonasidan foydalanish imkoniyati yaratiladi.

Oʻquvchilar loyihalarni Portaldagi “Mening maktabim” boʻlimi orqali kiritadi. Portaldan foydalanish uchun har bir oʻquvchiga avtomatiktarzda Portalda “kalit soʻzlar” shakllantiriladi. Kalit soʻzlar oʻquvchilar ota-onalarining telefon raqamlariga SMS xabar orqali yuboriladi.

Sinf rahbarlari har bir oʻquvchiga oʻzining maxsus “kalit soʻz”larini maxfiy tutishi hamda uchinchi shaxslarga oshkor etmasligi haqida tushintirish berishlari kerak.

Oʻquvchilar quyidagi usullardan foydalangan holda oʻz loyihalarini ilgari surishlari mumkin:

 avtomatik tarzda — loyiha namunalari orasidan oʻziga yoqqan loyihani tanlash orqali;
 mustaqil ravishda — taqdim etilgan loyiha namunalari orasida mavjud boʻlmagan loyihalarni yangidan shakllantirish orqali.

Loyihalar mustaqil ravishda shakllantirilgan taqdirda oʻquvchi tomonidan loyihaning mazmuni, loyihadan erishiladigan natija hamda uning dastlabki qiymati koʻrsatilishi lozim.

Mening maktabim — mening orzularim uyi! Tashabbus ko‘rsating, faol bo‘ling!