Yaponiyaning Yamagata universiteti vakillari bilan uchrashuv bo‘lib o‘tdi
2024-12-12 17:35:00 / Vazirlik yangiliklari
Uchrashuvda Yamagata Universiteti tomonidan O‘zbekistonda, xususan, Qoraqalpog‘iston Respublikasida olib borilayotgan ishlar muhokama qilindi.
Jumladan, Yaponiya tajribasi asosida Yamagata Universitetining professorlari bilan hamkorlikda amalga oshirilayotgan “U-Hope” va “Yori-I” dasturlarini amalga oshirish orqali kichik biznesni rivojlantirish va qo‘llab-quvvatlash “mentorlik tizimini yo‘lga qo‘yish jarayoni, joriy yilda erishilgan natijalar hamda 2025-yilga mo‘ljallangan rejalar muhokama qilindi.
Joriy yilda Yamagata Universiteti o‘quv markazi hamda Biznesni rivojlantirish banki bilan hamkorlikda o‘sish va rivojlanish salohiyatiga ega bo‘lgan tadbirkorlar faoliyatiga ko‘mak berish hamda hamrohlik qilish bo‘yicha 24 ta mentorlar o‘quv kurslarida o‘qitilib tayyorlandi.
O‘quv kurslari Yaponiyaning “U-Hope” dasturini o‘z ichiga olgan. Bunda, Yaponiyaning Yamagata universiteti professorlari tomonidan tayyorlangan 10 turdagi videorolik shaklida darslik hamda 6 ta turdagi “keys amaliyot”larini o‘z ichiga olgan.
Bugungi kunda, ushbu o‘quv dasturiga tadbirkorlar tomonidan qiziqishlar ortib bormoqda. Hozirda dasturga 14,6 ming nafardan ortiq tadbirkorlar qiziqish bildirgan bo‘lib, 5,8 ming nafardan ortiq o‘qish jarayonlari boshlangan hamda 3 ming nafarga yaqin tadbirkorlar sertifikat ega bo‘lgan.
Shu o‘rinda, mentorlar faoliyati bo‘yicha:
- Yaponiyalik mutaxassislar o‘quv dasturlari jarayonida muvaffaqiyatli qatnashgan tinglovchilardan 24 nafar mentor saralab oldi.
- Saralangan tinglovchilar dastlab O‘zbekistonda, so‘ngra Yaponiyaning Yamagata universitetida o‘z malakasini oshirib, xalqaro sertifikatga ega bo‘ldi (joriy yilning 18–27-oktabr kunlari).
- Shuningdek, o‘zaro tuzilgan shartnomalarga asosan har bir mentor tomonidan jami 300 nafar (har biriga 10–15 nafardan) trener tayyorlash majburiyati yuklatildi.
- O‘z navbatida, barcha mentorlar tomonidan o‘quv dasturlari va o‘qitish reja-grafiklari ishlab chiqilib, markazlar tomonidan tasdiqlandi.
Joriy yilning 18-noyabridan boshlab barcha hududlarda trenerlarni o‘qitish jarayonlari boshlab yuborildi.
Iqtisodiyot va moliya vazirligi
Axborot xizmati