Yaponiyaning “Hanwa Co. LTD” kompaniyasi vakillari bilan uchrashuv bo‘lib o‘tdi
2023-09-21 09:15:00 / Vazirlik yangiliklari
Iqtisodiyot va moliya vazirligi binosida Yaponiyaning “Hanwa Co. LTD” kompaniyasi vakillari hamda vazirlikning "Yashil" va bilim iqtisodiyoti, innovatsion texnologiyalar joriy etilishini qo‘llab-quvvatlash boshqarmasi mutaxassisalari o‘rtasida uchrashuv bo‘lib o‘tdi.
Bundan maqsad – O‘zbekiston va Yaponiya o‘rtasida 2022-yil imzolangan kelishuv doirasida respublikada Qo‘shma moliyalash mexanizmi (Joint Credit Mechanism – JCM)ni joriy etishda hamkorlik qilish.
Ma’lumot uchun: Qo‘shma moliyalashtirish mexanizmi JCM – Yaponiyaning rivojlanayotgan mamlakatlarda zamonaviy texnologiyalarning 50% gacha qismini qoplab berish asosida joriy qilish orqali issiqxona gazi emissiyasini kamaytirish bo‘yicha hamkorlik tizimi.
Muhokamada “Hanwa Co. LTD” kompaniyasining Energetika boshqarmasi rahbari Fukuzava Daigoro, investisiya masalalari bo‘yicha mutaxassisi Otagshuro Akira, Mexmonov Farrux, “Ernst & Young ShinNihon” kompaniyasining O‘rta Osiyo mamlakatlari bo‘yicha mutaxassisi hamda vazirlikning “Yashil” iqtisodiyotni rivojlantirish boshqarmasi mas’ul xodimlari ishtirok etishdi.
Shuningdek, JCM mexanizmi doirasida Qashqadaryo viloyati Yakkabog‘ tumanida joylashgan ikkita tibbiyot muassasasida quyosh panellarini o‘rnatish hamda isitish tizimida bioyoqilg‘idan foydalanishga o‘tkazish natijasida issiqxona gazlari chiqarilishini kamaytirish loyihasini amalga oshirish muhokama qilindi.
Uchrashuv davomida “Hanwa Co. LTD” vakillari tomonidan vazirlik mutaxassislariga Yakkabog‘ tumanida joylashgan ikkita tibbiyot muassasasi uchun taklif etilayotgan loyihalarning texnik vazifalari, uning afzalliklari va kutilayotgan natijalar to‘g‘risida taqdimot qilindi.
Yakunda tomonlar respublikada Qo‘shma moliyalashtirish mexanizmi doirasida amalga oshiriladigan loyihalarni joriy qilishda hamkorlik qilishga kelishib olishdi.
Iqtisodiyot va moliya vazirligi
Jamoatchilik bilan aloqalar boshqarmasi