O‘zbekiston Respublikasi Iqtisodiyot va moliya vazirligi

Ushbu musobaqa 40 ga yaqin vazirliklar va tashkilotlar o‘rtasida o‘tkazildi. Unga ko‘ra, 34 ta jamoa 8 ta guruhga bo‘lingan holda 3-noyabrdan guruh o‘yinlarini o‘tkazishni boshlashdi.

Jumladan, Iqtisodiyot va moliya vazirligi qur’a natijalariga ko‘ra “I” guruhida O‘zbekiston Respublikasi Prezidenti huzuridagi Ijtimoiy himoya agentligi, Milliy paralimpiya qo‘mitasi va Ichki ishlar vazirligi bilan bir guruhdan o‘rin oldi.

Vazirligimiz jamoasi musobaqani 3-noyabr kuni O‘zbekiston Respublikasi Prezidenti huzuridagi Ijtimoiy himoya agentligiga qarshi o‘yin bilan boshladi va yirik hisobda g‘alaba qozondi. Guruhdagi ikkinchi va uchinchi o‘yinlarda Ichki ishlar vazirligi va Milliy paralimpiya qo‘mitasi jamoalari ustidan zafar quchdi.

Shu bilan vazirlik jamoasi guruhdan 7 ochko jamg‘argan holda to‘plar nisbatiga ko‘ra ikkinchi o‘rinni qayd etib, musobaqaning pley-off bosqichiga yo‘l oldi.

Pley-off bosqichidagi birinchi raqib Oliy ta’lim, fan va innovatsiyalar vazirligiga qarshi o‘yin 6-noyabr kuni o‘tkazildi, mazkur o‘yinda jamoamiz 4:1 hisobida g‘alaba qozondilar. Musobaqaning 5 kuni (7-noyabr) chorak finalda jamoamiz Energetika vazirligiga qarshi maydonga tushdilar. Bahslarga boy o‘tgan o‘yinda jamoamiz 5:2 hisobida g‘alaba qozonib, yarim finalga yo‘l oldilar.

Yarim final o‘yinida jamoamizni O‘zbekiston futbol assotsiatsiyasiga qarshi qiziqarli o‘yin kutardi. 8-noyabr kuni o‘tkazilgan yarim final uchrashuvi, afsuski, 0:2 hisobida jamoamizning mag‘lubiyati bilan yakunlandi.

Jamoamiz 9-noyabr kuni “JAR” sport sog‘lomlashtirish markaziga qarashli futbol stadionida 3-o‘rin uchun O‘zbekiston Respublikasi Prezidenti huzuridagi Statistika qo‘mitasiga qarshi maydonga tushib, 1:0 hisobida g‘alaba qozongan holda 3-o‘ringa egalik qildi.

Iqtisodiyot va moliya vazirligi

Axborot xizmati