Jahon banki delegatsiyasi vakillari bilan davlat moliyaviy boshqaruvi yuzasidan fikr almashildi
2024-09-26 14:55:00 / Vazirlik yangiliklari
Uchrashuvda Jahon bankining moliya boshqaruvi bo‘yicha mutaxassisi Nurgul Tatibekova hamda Iqtisodiyot va moliya vazirligi Mahalliy budjet xarajatlaridagi xavflarni o'rganish boshqarmasi boshlig‘i Farruh Aminov, Davlat hokimiyati va respublika ijro etuvchi organlar faoliyatini moliyaviy taʼminlash boʻlimi boshlig‘i Foziljon Kalandarov va boshqa mas’ul vakillar ishtirok etdi.
Muloqot davomida tomonlar davlat moliyasi samaradorligini oshirish, kelgusida amalga oshirilishi zarur bo‘lgan islohotlarni 2025–2030-yillarda O‘zbekiston Respublikasining davlat moliyasini boshqarish tizimini takomillashtirish strategiyasida aks ettirish, mahalla budjetini shakllantirishning ahamiyati va o‘ziga xos jihatlari, xususan, hududlar infratuzilmasini rivojlantirish, tadbirkorlik va yangi ish o‘rinlarini yaratishdagi rolini muhokama qildilar.
Shuningdek, suhbatda tomonlar soliq boshqaruvi sifatini yanada oshirish, tuman (shahar)lar budjetini boshqarish va mustaqilligini oshirish, hududlarda xizmatlar, turizm, ishlab chiqarish sohalarini rivojlantirish hamda ularni qo‘llab-quvvatlash maqsadida shakllantirilayotgan master-rejalarning ahamiyati yuzasidan fikr almashdilar.
Muzokaralar yakunida tomonlar o‘zaro manfaatli hamkorlik aloqalarini rivojlantirish va mustahkamlash hamda oldinga qo‘yilgan maqsadlarga erishishda tizimli va samarali faoliyat olib borish yuzasidan fikr almashdilar.
Iqtisodiyot va moliya vazirligi
Axborot xizmati