Iqtisodiyot va moliya vazirligi hamda Xalqaro valyuta jamg‘armasi vakillari mamlakatimizdagi makroiqtisodiy jarayonlar yuzasidan fikr almashdi
2024-09-20 16:00:00 / Vazirlik yangiliklari
Uchrashuvda XVJning O‘zbekistondagi vakolatxonasi rahbari Koba Gvenetadze, XVJning katta iqtisodchilari Laurens Dvayt va Alexandro Simone hamda Iqtisodiyot va moliya vazirligining mas’ul vakillari ishtirok etdi.
Muloqot davomida tomonlar bugungi kunda mamlakatimizdagi makroiqtisodiy tendensiyalar, barqaror iqtisodiy o‘sish, xizmatlar va sanoat sohalarini yanada rivojlantirish, inflatsiya darajasi barqarorligini ta’minlash, hududlar iqtisodiyoti va infratuzilmaviy o‘sishni qo‘llab-quvvatlash maqsadida shakllantirilayotgan master-rejalar, xususiy sektorni, jumladan, kichik va o‘rta tadbirkorlik subyektlariga ko‘maklashish, eksport salohiyatini oshirish masalalarini muhokama qildi.
Shuningdek, muhokamalar jarayonida tomonlar O‘zbekistonda davom ettirilayotgan tizimli islohotlar, xususan, davlat ishtirokidagi korxonalar va banklarning transformatsiya va xususiylashtirish jarayonlari, energetika sohasida bozor munosabatlarini shakllantirish bo‘yicha amalga oshirilayotgan o‘zgarishlar, energiya samaradorlikni oshirish yuzasidan fikr almashdi.
Shu bilan birga, yo‘l qurilishi va energetika sohalarida amalga oshirilayotgan davlat-xususiy sheriklik loyihalari, yashil iqtisodiyotni rivojlantirish orqali yashil va inkluziv o‘sishni ta’minlash, barqaror ish o‘rinlarini yaratish, soliq boshqaruvi sohasini takomillashtirish, budjet prognozlari yuzasidan va boshqa sohalarda amalga oshirilayotgan ishlar bo‘yicha so‘z yuritildi.
Muzokaralar yakunida tomonlar o‘zaro manfaatli hamkorlik aloqalarini yanada rivojlantirish va mustahkamlashga kelishib oldilar.
Iqtisodiyot va moliya vazirligi
Axborot xizmati