O‘zbekiston Respublikasi Iqtisodiyot va moliya vazirligi

Uchrashuvda OTB Prezidenti offisining maxsus katta maslahatchisi Uorren Evans, Iqlim o‘zgarishi bo‘yicha mutaxassis Ketlin Enn, OTBning O‘zbekistondagi doimiy vakolatxonasining operatsiyalar bo‘yicha rahbari Mirzo Iskandar Gulamov hamda Iqtisodiyot va moliya vaziri o‘rinbosari Jasur Karshibayev va boshqa mas’ul vakillar ishtirok etdilar.

Muloqot davomida tomonlar mamlakatimizda energetika sohasida amalga oshirilayotgan o‘zgarishlar, energiya samaradorlikni oshirish, iqlim o‘zgarishini yumshatish, uglerod bozorini rivojlantirish, suv resurslaridan samarali foydalanish hamda irrigatsiya tizimini rivojlantirish, suv isitish tizimlarini zamonaviy talablar asosida takomillashtirish masalalarini muhokama qildilar.

Shuningdek, uchrashuvda yashil iqtisodiyotga o‘tish yuzasidan olib borilayotgan islohotlar, hududlarni rivojlantirish uchun shakllantirilayotgan master-rejalar, kichik va o‘rta tadbirkorlikni rivojlantirish, davlat ishtirokidagi korxonalar va banklarning transformatsiya jarayonlari hamda ushbu sohalarda ilgo‘r tajribalarda foydalanish va xalqaro moliya tashkilotlari bilan hamkorlik yuzasidan fikr almashdilar.

Shu bilan birga, uchrashuv doirasida Osiyo taraqqiyot banki bilan “Energetika sektorini rivojlantirish” va “Moliyaviy bozorlarni rivojlantirish” dasturlari doirasida qarz bitimlari imzolandi.

Ma’lumot uchun: Ushbu dasturlarda ko‘zlangan maqsad energetika sektorini rivojlantirish va normativ-huquqiy bazasini mustahkamlash, moliyaviy barqarorligi yaxshilash, uglerod intensivligi kamaytirish, energiya samaradorligiga talabni oshirishga qaratilgan islohotlarni amalga oshirish hamda kapital bozori infratuzilmasi va normativ-huquqiy bazasi rivojlanishiga qaratilgan islohotlarni amalga oshirish hisoblanadi.

Muzokaralar yakunida tomonlar yuqorida qayd etilgan masalalar yuzasidan hamkorlikdagi faoliyatni yanada kengaytirish va rivojlantirishga kelishib oldilar.

Iqtisodiyot va moliya vazirligi

Axborot xizmati