O‘zbekiston Respublikasi Davlat moliyasi statistikasini takomillashtirishga bag‘ishlangan seminar bo‘lib o‘tdi
2024-07-12 09:40:00 / Matbuot anjumanlari
Trening Iqtisodiyot va moliya vazirligining Jahon banki tomonidan moliyalashtirilayotgan Institutsional salohiyatni oshirish loyihasi doirasida o‘tkazildi.
Tadbirni Iqtisodiyot va moliya vazirligi Davlat budjeti siyosati departamenti direktori Sherzod Muxamedov ochib berdi va o‘z nutqida Xalqaro valyuta jamgʻarmasi (XVJ)ning axborot tizimlarida mamlakatning asosiy makroiqtisodiy va moliyaviy koʻrsatkichlarini aks ettirish maqsadida XVJning statistik ma’lumotlar bazasiga Davlat boshqaruvi sektori, markaziy hukumat operatsiyalari va qarzi toʻgʻrisidagi maʼlumotlar taqdim etib kelinayotganini ma’lum qildi.
Seminar davomida xalqaro ekspert Irina Dubinina Davlat moliyasi statistikasi (DMS) qo‘llanmasi hamda XVJning choraklik va yillik DMS hisobotlarini taqdim etish bo‘yicha talablar to‘g‘risida qisqacha ma’ruza qildi.
Shuningdek, seminar davomida xalqaro ekspert tomonidan XVJning DMS-2014 qo‘llanmasiga muvofiq amaliy mashg‘ulotlar o‘tkazildi. Shuningdek, O‘zbekiston tomonidan taqdim etilayotgan hisobotlardagi ma’lumotlar va kamchiliklar hamda seminar yakunida O‘zbekistonning fiskal statistika ma’lumotlarini xalqaro standartlar asosida yanada takomillashtirishga oid ustuvor yo‘nalishlarni belgilash bo‘yicha muhokamalar o‘tkazildi.
Ta’kidlash joizki, Oʻzbekiston Respublikasi Prezidentining 2024-yil 4-martdagi “Oʻzbekiston Respublikasi Prezidenti huzuridagi Statistika agentligi faoliyatini tashkil etish chora-tadbirlari toʻgʻrisida”gi PQ–114-sonli qarori 4-ilovasi 5 va 17-bandlariga muvofiq davlat moliyasi statistikasini takomillashtirish, XVJ axborot tizimlarida mamlakatning asosiy makroiqtisodiy va moliyaviy koʻrsatkichlarini aks ettirishni taʼminlash hamda jamg‘armaning Kengaytirilgan maʼlumotlarni tarqatishning umumiy tizimi (k-MTUT)dan Maʼlumotlarni tarqatishning maxsus tizimi (MTMT)ga oʻtish vazifalari Iqtisodiyot va moliya vazirligi zimmasiga yuklatilgan.
Shu munosabat bilan, tashkil etilgan ikki kunlik trening yakunida xalqaro konsultant hamkorligida XVJ axborot tizimlarida O‘zbekiston Respublikasining asosiy makroiqtisodiy va moliyaviy koʻrsatkichlarini aks ettirishni taʼminlash bo‘yicha Davlat moliyasi statistikasini takomillashtirishga oid tegishli chora-tadbirlar belgilab olinishiga kelishildi.
Iqtisodiyot va moliya vazirligi
Axborot xizmati