O‘zbekiston Respublikasi Iqtisodiyot va moliya vazirligi

Joriy yilning 7-iyul kuni nufuzli xalqaro moliya va ilmiy-tadqiqot institutlari hamda konsalting kompaniyalari vakillarini Toshkent shahrida birlashtirgan Xalqaro sheriklik tashabbuslari haftaligi doirasida “Barqaror iqtisodiy taraqqiyot: dolzarb masalalar” mavzusidagi muhokama sessiyasi bo‘lib o‘tdi.

Unda, jumladan, Jahon Banki, BMT Taraqqiyot Dasturi vakillari, Polsha, Singapur, Ruminiyadan xalqaro ekspertlar hamda mahalliy ishtirokchilar Barqaror iqtisodiy o‘sishni ta'minlashning muhim yo‘nalishlari haqida fikr yuritdi.
Shuningdek, ishtirokchilar xususiylashtirish, raqamlashtirish, qolaversa, infratuzilma, tadbirkorlik va inson kapitalini rivojlantirish, sanoat transformasiyasi hamda iqtisodiy o‘sishni ta'minlashda raqobat siyosatining roli yuzasidan muhokama olib bordilar.

Sessiyada O‘zbekiston Respublikasi Iqtisodiyot va moliya vaziri o‘rinbosari Ilhom Norqulov, BMTTDning doimiy vakili Matilda Dimovska, Singapur xalqaro hamkorlik tashkiloti ijrochi direktori Kong Vay Mun, Jahon Bankining Yevropa va Markaziy Osiyo mintaqalari bo‘yicha katta iqtisodchisi Pinar Yashar, Ruminiya Raqobat tashkiloti prezidenti Bogdan Kirisu, Xalqaro ekspert Marek Grabarek hamda Vazirlar Mahkamasi huzuridagi Makroiqtisodiy va hududiy tadqiqotlar instituti direktori Umid Abidxadjaev ishtirok etdilar.

Tadbir boshida sessiya moderatori Fred Harrison ishtirokchilarga bugungi kunda jahon iqtisodiyotida kuzatilayotgan murakkabliklar va mazkur sharoitda O‘zbekiston iqtisodiyotida erishilayotgan natijalar to‘g‘risida axborot taqdim etdi.

So‘ngra O‘zbekistonda amalga oshirilayotgan islohotlar, iqtisodiy ko‘rsatkichlar va istiqboldagi vazifalar to‘g‘risidagi taqdimot uchun Iqtisodiyot va moliya vaziri o‘rinbosari Ilhom Norqulovga so‘z berildi.

U o‘z taqdimotida global makroiqtisodiy jarayonlardagi murakkabliklar, jumladan, yuqori inflyasiya va foiz stavkalari, xalqaro transport-logistika zanjirlaridagi uzilishlar hamda oshib borayotgan energiya resurslari sharoitida O‘zbekistonning o‘z oldiga qo‘ygan maqsadlari va ularga erishish bo‘yicha amalga oshirilishi belgilangan ustuvor vazifalarni so‘zlab o‘tdi.

Shuningdek, Ilhom Norqulov "2022-2026-yillarga mo‘ljallangan Yangi O‘zbekistonning taraqqiyot strategiyasi"da belgilangan O‘zbekistonni “o‘rtadan yuqori daromadli” mamlakatlar guruhiga kirishi uchun amalga oshiriladigan muhim islohotlar yo‘nalishlariga alohida to‘xtaldi.

Kong Vay Mun ishtirokchilarni Singapurning raqamli davlat xizmatlarini ko‘rsatish tajribasi va raqamli transformatsiya jarayoni bilan tanishtirdi. Shundan so‘ng Singapur sanoat transformasiyasi dasturi va uni O‘zbekiston sharoitida amalga oshirish istiqbollari yuzasidan fikr almashildi.

Marek Grabarek o‘z nutqi davomida quyidagi kabi mavzularni ko‘tardi:

•       xususiylashtirish va infratuzilmani rivojlantirishning barqaror o‘sishni ta'minlashdagi ahamiyati;

•       xususiylashtirish jarayoni va mazkur yo‘nalishda Pol'shaning tajribasi;

•       ijtimoiy soha inklyuzivligini oshirishda davlat-xususiy sheriklik mexanizmining o‘rni;

•       O‘zbekistonda DXSh mexanizmini keng joriy etishning istiqbollari;

•       barqaror iqtisodiy rivojlanishga erishishda infratuzilmaning ahamiyati;

•       infratuzilma loyihalarini moliyalashtirishdagi ustuvor vazifalar;

•       yashil, barqaror va inklyuziv taraqqiyotni ta'minlashda innovasion infratuzilma loyihalarini amalga oshirish istiqbollari.

BMTTDning doimiy vakili Matilda Dimovska jamiyatda ayollarning roli va iqtisodiy faolligini oshirish, inson kapitalini rivojlantirish, hamda BMTTD tomonidan O'zbekistonda amalga oshirilayotgan loyihalar hajmi va ahamiyatida alohida to'xtalib o'tdi.

Jahon Banki mutaxassislari tomonidan barqaror rivojlanish maqsadlariga erishishda xalqaro hamkorlik hamda mazkur tashkilot bilan birgalikda O‘zbekistonda amalga oshirilayotgan ijtimoiy-iqtisodiy loyihalar va ularning natijadorligi e'tirof etildi.

Makroiqtisodiy va hududiy tadqiqotlar instituti direktori Umid Abidxadjayev mamlakatimiz iqtisodiyotini rivojlantirish va iqtisodiy barqarorlikni ta’minlashda raqobatning o‘rniga to‘xtalib o‘tib, “Raqobat to‘g‘risida”gi qonun yangi tahrirda qabul qilinganligi, ushbu Qonun bilan raqobat sohasidagi davlat siyosatining asosiy yo‘nalishlari belgilanganini ta’kidladi. Shu bilan birga, yangi tahrirda qabul qilingan Konstitutsiyada tadbirkorlar, ishbilarmonlar uchun ko‘plab huquqiy imkoniyatlar yaratilgani, davlat o‘z zimmasiga bozor munosabatlarini rivojlantirish, qulay investitsiyaviy va ishbilarmonlik muhitini ta’minlash, halol raqobat uchun shart-sharoitlar yaratish bo‘yicha majburiyatlar olayotgani yuzasidan fikr bildirdi.

Muhokama yakunida iqlim o‘zgarishiga qarshi kurashish sharoitida innovatsion ish o‘rinlarini yaratish va muqobil energiya resurslaridan foydalanishni kengaytirish imkoniyatlari ko‘rib chiqildi.

Sessiya OAV vakillari ishtirokidagi savol-javoblar bilan yakunlandi.
 
Iqtisodiyot va moliya vazirligi

Jamoatchilik bilan aloqalar boshqarmasi