O‘zbekiston Respublikasi Iqtisodiyot va moliya vazirligi

Tadbirda qimmatbaho metallar va qimmatbaho toshlar muomalasi sohasida amalga oshirilayotgan islohotlar, erishilgan natijalar va ustuvor vazifalar yuzasidan ma’lumot berildi. Qayd etilganidek, so‘nggi yillarda asillik darajasini aniqlash va davlat tamg‘asi bilan tamg‘alash xizmatlariga bo‘lgan talab izchil oshib bormoqda. Xususan, 2023-yilda 989 kilogramdan ortiq, 2024-yilda 1 tonna-yu 141 kilogramm zargarlik buyumlari ekspertizadan o‘tkazilib tamg‘alangan bo‘lsa, 2025-yil yakunlariga ko‘ra, mazkur ko‘rsatkich qariyb 1,5 tonnani tashkil etdi.

 Matbuot anjumanida qimmatbaho metallar va qimmatbaho toshlar muomalasi ustidan olib borilayotgan texnik hamda gemmologik ekspertiza ishlari, sohaga xalqaro standartlarni joriy etish, mutaxassislar malakasini oshirish bo‘yicha amalga oshirilayotgan ishlar haqida ham ma’lumot berildi.

Shuningdek, litsenziyalash va ruxsat berish jarayonlari to‘liq raqamlashtirilgani, davlat xizmatlari inson omilisiz elektron shaklda ko‘rsatilayotgani ta’kidlandi. 2026-yil 1-iyun holatiga ko‘ra, respublikada qimmatbaho metallar va qimmatbaho toshlar bilan faoliyat yuritayotgan subyektlar soni 2 778 tani tashkil etdi. Faoliyat turlari bo‘yicha rasmiylashtirilgan ruxsat beruvchi hujjatlar soni esa 4 059 taga yetdi. Tadbir davomida sohada qonuniylikni ta’minlash, huquqbuzarliklarning oldini olish hamda korrupsiyaga qarshi kurashish bo‘yicha amalga oshirilayotgan chora-tadbirlar haqida ham ma’lumot berildi.

Xususan, litsenziyalash jarayonlarini raqamlashtirish, xizmat ko‘rsatish jarayonlarida video kuzatuv tizimini joriy etish va nazorat tadbirlarini zamonaviy texnik vositalar orqali amalga oshirish ishlari qayd etildi.

Tadbir yakunida ommaviy axborot vositalari vakillari va tadbirkorlar bilan ochiq muloqot o‘tkazilib, sohani yanada rivojlantirish yuzasidan taklif va mulohazalar muhokama qilindi.

Iqtisodiyot va moliya vazirligi

Axborot xizmati va kommunikatsiyalar boshqarmasi