“Issiqxona gazlarining chiqarilishini cheklash to‘g‘risida”gi qonun loyihasi Oliy Majlis Qonunchilik palatasi tomonidan qabul qilindi
2024-07-16 22:00:00 / Vazirlik yangiliklari
Qonun loyihasi bilan issiqxona gazlari chiqarilishini cheklashning asosiy prinsiplari, qisqartirilgan issiqxona gazlariga egalik munosabatlari, issiqxona gazlari chiqarilishini cheklash sohasidagi davlat organlarining vakolatlari hamda issiqxona gazlarining chiqarilishi hisobini davlat tomonidan yuritish tartib-qoidalari belgilanmoqda.
Qonun loyihasining qabul qilinishi mamlakatimizda issiqxona gazlari chiqarilishini kamaytirish va xalqaro bozorlarda buning natijasida hosil bo‘ladigan uglerod birliklari savdosini yo‘lga qo‘yishni tartibga solish hamda O‘zbekistonning BMT Iqlim o‘zgarishi bo‘yicha doiraviy Konvensiyasi doirasida tuzilgan Parij bitimiga muvofiq olingan majburiyatlarini bajarish imkonini beradi.
Ma’lumot uchun: O‘zbekiston Respublikasi Parij bitimi doirasida issiqxona gazlarining yalpi ichki mahsulot birligiga nisbatan solishtirma ajratmalarini 2030-yilga kelib, 2010-yildagi darajaga nisbatan 35 foizga qisqartirish majburiyatini olgan.
Shuningdek, mazkur Qonun loyihasi bilan issiqxona gazlarining chiqarilishi reyestri hamda issiqxona gazlari kadastrini shakllantirish va yuritish tartibi, uglerod birliklari muomalasini amalga oshirish tartib-qoidalari, monitoring, hisobot va verifikatsiya (MRV) tizimi asoslari hamda tartibi nazarda tutilmoqda.
Bunda, Iqtisodiyot va moliya vazirligi xalqaro va ichki uglerod bozoriga yo‘naltiriladigan uglerod birliklari reyestrini shakllantirish va yuritish, shuningdek, respublika hamda xalqaro darajada uglerod birliklari savdosini amalga oshirishda vakolatli organ etib belgilanmoqda.
Iqtisodiyot va moliya vazirligi
Axborot xizmati