O‘zbekiston Respublikasi Iqtisodiyot va moliya vazirligi

Joriy yilning 13-may kuni Jahon bankining Yevropa va Markaziy Osiyo bo‘yicha barqaror rivojlanish masalalari bo‘yicha mintaqaviy direktori Sameh Vahba hamda O‘zbekiston Respublikasi Bosh vaziri o‘rinbosari – Iqtisodiyot va moliya vaziri Jamshid Qo‘chqorov o‘rtasida uchrashuv bo‘lib o‘tdi.

Uchrashuvda Jahon bankining Markaziy Osiyo bo‘yicha mintaqaviy direktori Naji Benhassin, O‘zbekistondagi loyihalar rahbari Anastasiya Aleksandrova, qishloq xo‘jaligi bo‘yicha katta iqtisodchisi Pyer Gerber hamda Iqtisodiyot va moliya vaziri o‘rinbosari Ilhom Norqulov va boshqa mas’ul vakillar ishtirok etdi.

Muzokaralar davomida tomonlar o‘zaro manfaatli hamkorlik aloqalarini rivojlantirish, jumladan, qishloq xo‘jaligini rivojlantirish sohasida samarali loyihalarni amalga oshirish hamda suv resurslarini boshqarish sohasida hamkorlik jadallashtirish yuzasidan muhokamalar olib bordi.

Xususan, muhokamalarda quyidagi asosiy masalalarga e’tibor qaratdi.

• qishloq xo‘jaligida samaradorlikni oshirish, zamonaviy agrotexnologiyalarni joriy etish hamda ushbu yo‘nalishda mamlakatimizda amalga oshirilayotgan loyihalar;
• AgriConnect dasturi doirasidagi hamkorlik olib borish, jumladan, yuqori qo‘shilgan qiymatli bozor segmentlariga chiqish uchun fermer xo‘jaliklari va tadbirkorlik subyektlarining bilim va ko‘nikmalarini oshirish, ularning moliyalashtirish imkoniyatlarini kengaytirish, qishloq xo‘jaligida zamonaviy yechimlarni taklif etish;
• irrigatsiya infratuzilmasini modernizatsiya qilish, suv tejovchi innovatsion yechimlarni kengaytirish hamda iqlim o‘zgarishi sharoitida agrar tarmoqning barqarorligini ta’minlashda hamkorlikni rivojlantirish.
   

Uchrashuv yakunida tomonlar o‘zaro manfaatli hamkorlikni izchil rivojlantirish, mavjud loyihalar samaradorligini oshirish hamda ustuvor yo‘nalishlar bo‘yicha yangi tashabbuslarni ilgari surishga kelishib oldi.

Iqtisodiyot va moliya vazirligi

Axborot xizmati va kommunikatsiyalar boshqarmasi