O‘zbekiston Respublikasi Iqtisodiyot va moliya vazirligi

Seminarda O‘zbekistonning yirik davlat kompaniyalari, xalqaro tashkilotlar vakillari hamda SAP, 1C, IFS va AVEVA kabi yetakchi xalqaro va mahalliy kompaniyalarning ekspertlari ishtirok etdi. Tadbir davomida raqamlashtirish va ERP-tizimlarni joriy etishga doir zamonaviy yechimlarga bag‘ishlangan taqdimotlar namoyish etildi.

Tadbir doirasida yirik davlat korxonalarida raqamli transformatsiyani amalga oshirish, zamonaviy IT-yechimlarni joriy etish, shuningdek, ularni Yagona transformatsiya platformasi bilan integratsiyalash masalalari muhokama qilindi.

O‘zbekiston Respublikasi Prezidentining 2025-yil 18-noyabrdagi F-59-sonli farmoyishi ijrosini ta’minlash maqsadida davlat kompaniyalari zimmasiga raqamlashtirish jarayonlarini faollashtirish, boshqaruv samaradorligini oshirish va zamonaviy axborot tizimlarini joriy etish bo‘yicha aniq vazifalar yuklatilgan.

Kadrlar salohiyatini rivojlantirishga doir tashabbuslarga alohida e’tibor qaratildi: “UzAssets” AJ sanoatni raqamlashtirish bo‘yicha jahon yetakchilari bilan hamkorlikda IT, sun’iy intellekt, ERP va robotlashtirish sohalarida milliy mutaxassislarni tayyorlashga yo‘naltirilgan malaka markazini yaratish loyihasini amalga oshirmoqda.

Shuningdek, O‘zbekistonning yirik davlat korxonalarida ERP-tizimlarini joriy etish bo‘yicha amaliy tajribalarga alohida urg‘u berildi. Seminar ishtirokchilari o‘zaro tajriba almashib, raqamli texnologiyalar yordamida boshqaruv samaradorligini oshirishning amaliy yondashuvlarini ko‘rib chiqdi.

Seminar yakunida “UzAssets” AJ va SAP kompaniyasi o‘rtasida O‘zbekiston davlat kompaniyalarida raqamli transformatsiya sohasida hamkorlikni rivojlantirish va qo‘shma loyihalarni amalga oshirishga qaratilgan hamkorlik memorandumi imzolandi.

Iqtisodiyot va moliya vazirligi

Axborot xizmati va kommunikatsiyalar boshqarmasi